La television de Catalonha TV3 ven d’emetre un reportatge de tres minutas sus la situacion dins la vila de Mariupol, principal pòrt ucraïnés de la mar d’Azov que se tròba assetjat per las tropas russas dempuèi una cinquantena de jorns. Lo jornalista Manel Alías, especialista del conflicte en Donbass, es ara intrat dins l’airal de Mariupol ocupat per l’armada russa e mòstra cossí los estatjants ensajan de subreviure dins una vila destrucha sens aiga ni electricitat.
 
Lo reportatge mòstra la destruccion de la vila, comprés lo teatre que lo bombardèron las tropas russas quand de centenats de civils s’èran refugiats dedins. A mai, Manel Alías parla amb qualques ciutadans que planhon lo cambiament radical de lors vidas d’un mes a l’autre.
 
“Soi tornat a Mariupol. I foguèri en 2019 e ai pas reconegut la vila. Sabi pas cossí s’es pogut arribar a un tal ponch. Vaicí lo reportatge ont ensajam de descriure l’indescriptible. Lo sètge de Mariópol, de dintre estant”, çò a escrich lo jornalista sus Twitter.
 
 

He tornat a Mariúpol. Hi vaig ser al 2019 i no he reconegut la ciutat. No sé com s'ha pogut arribar a aquest punt. Aquí la crònica on intentem descriure l'indescriptible. El setge de Mariúpol, des de dins. https://t.co/bsSaU2epSy

— Manel Alías (@ManelAlias) April 12, 2022