Dimars de ser a Carcassona, la polícia tirèt uèch còps de fuòc sus una veitura menada per una femna de 31 ans, que los policièrs prenguèron per error per un malfactor evasit. Dimècres, la justícia sasiguèt l’inspeccion generala de la polícia estatala francesa (IGPN), çò anoncièt a l’AFP lo procuraire de la Republica, Antoine Leroy.
 
La sasida de l’IGPN permetrà de verificar se lo policièr incriminat faguèt usatge de la siá arma de servici “confòrmament a la reglamentacion en vigor”, çò declarèt Leroy.
 
Lo malfactor en question, que s’èra evasit de l’espital de Besièrs en setembre passat e qu’èra condemnat per violéncias, òm l’aviá vist dins lo meteis endrech qualques minutas abans, dins una veitura identica a la que foguèt atacada, segon las explicacions del procuraire.
 
La menaira capitèt de fugir l’atac malgrat los dos pneumatics trencats e s’amaguèt dins la botiga d’un centre comercial que i aviá près de l’endrech, en demandant als emplegats de telefonar a la polícia perque qualqu’un la voliá tuar.