Lo realizaire e productor estatsunidenc succedirà al cineasta italian Nanni Moretti per presidir la jurada de la 66a edicion del Festenal de Canas (Vencenc), que se debanarà del 15 al 26 de mai. “La miá admiracion per la manièra ferma que lo Festenal de Canas defend lo cinèma internacional es totala. Perque lo de Canas es lo mai prestigiós de totes los festenals, çò que li permet de contunhar d’afirmar que lo cinèma es un art que transcendís las culturas e las generacions”, çò a declarat Steven Spielberg dins un comunicat oficial.
 
Steven Spielberg, dins sos 66 ans, a presentat divèrses filmes a Canas, mai que mai fòra competicion. En 1974, i ganhèt lo prèmi del scenari per The Sugarland Express.
 
Los organizaires del festenal considèran qu’Spielberg es un “incessant vai-e-vèni entre lo pantais e la realitat. Alternant entre filmes de divertiment e de reflexions grèvas sus l’istòria, lo racisme o la condicion umana, es testimòni de la siá aspiracion a un Mond pacific e reconciliat”.
 
Spielberg succedís aital a un prestigiós casting: Nanni Moretti en 2012, Robert De Niro en 2011, Tim Burton en 2010, Isabelle Huppert en 2009 e Sean Penn en 2008.