Lo tribunal d’apelacion d’Ais de Provença anullèt ièr, dijòus, lo tresen plan de salvagarda de l’emplec (PSE) presentat pel grop Unilever dins l’encastre de la barradura de la fabrica Fralib de Gèmas (País Marselhés), que doas primièras versions contestadas pels salariats èran ja estadas invalidadas.

Lo tribunal a verificat “la nullitat de la procedura iniciada al títol del l’article L 2323-6 del còde del trabalh, la nullitat del plan de salvagarda de l’emplec e la dels licenciaments ja intervenguts”. E mai a ordenat a la societat Fralib de “reprene dempuèi lo començament aquela procedura e de presentar al comitat d’entrepresa un plan de salvagarda de l’emplec que concernisca l’ensems dels salariats del sit de Gèmas.
 
Dins un comunicat, lo grop Unilever a indicat prene acte de la decision, en remembrant las mesuras mesas en marcha dempuèi dos ans e mièg, mai que mai en matèria de reclassament dels salariats.
 
Los representants sindicals dels emplegats se regaudissián d’aquela decision. De fach, en febrièr de 2011, lo tribunal general de Marselha aviá jutjat lo primièr PSE “desprovesit de tota indicacion que permeta de conéisser los mejans qu’aquela societat […] es en mesura de consagrar al reclassament dels salariats”. Lo segond plan presentat per Unilever foguèt invalidat en novembre de 2011 pel tribunal d’apelacion d’Ais de Provença, qu’estimèt qu’aquelas proposicions de reclassament èran pas seriosas.
 
En primièra instància, davant lo tribunal de Marselha, lo tresen plan foguèt, al contrari, jutjat confòrme en abril de 2012 e los representants dels salariats s’apelèron. Ochanta dos salariats, sus los ancians 182, refusèron la barradura de lor usina —que sos locals e sas maquinas foguèron compradas en setembre per la comunautat urbana Marselha Provença Metropòli (MPM)— e contunhèron l’activitat per mejan d’una societat cooperativa.
 
“Una longa nuèch mas un resultat de satisfaccion”, çò disián los salariats del sit de Gèmas a La Provence. Per aqueles 72 salariats que relancèron l’activitat de l’usina, proprietat de la comunautat urbana MPM, la decision que prenguèt ièr lo tribunal d’Ais poiriá cambiar las causas. “Esperem que fin finala acceptaràn de menar a tèrme de veritablas negociacions”, çò diguèt al jornal numeric provençal Gérard Cazorla, secretari del comitat dels trabalhadors, que l’inspeccion del trabalh refusèt son licenciament per de rasons economicas.
 
Fa de meses que los salariats reclaman l’autrejament de volums de produccion en sostractança, per permetre lo lançament de lor projècte de societat cooperativa e tanben la marca Éléphant, çò que lo grop Unilever a totjorn refusat. La setmana passada, lo socialista Eugène Caselli diguèt que fariá de cambadas per que l’Elisi demandèsse a Unilever de sèire a l’entorn de la taula de negociacions.
 
“Sèm a marcar l’istòria sociala del país”, çò diguèt Cazorla, davant un auditòri de salariats euforics.