capçalera campanha

Actualitats

InternacionalPolitica

Catalangate: espionats amb Pegasus mai d’una seissantena de politicians e jornalistas independentistas catalans

La revista The New Yorker explica que los independentistas catalans son, per ara, lo collectiu mai nombrós qu’aja patit una intrusion d’aquela sòrta

| The New Yorker
Lo setmanièr The New Yorker publiquèt diluns passat en primièra pagina un bèl reportatge entitolat “Cossí las democracias espionan lors ciutadans”, centrat suls marrits usatges faches per qualques estats del logicial israelian Pegasus. Segon aquel reportatge, una seissantena de politicians e jornalistas independentistas catalans son estats espionats amb Pegasus, un logicial que dona als espions accès a tot lo contengut del telefonet e lor permet  quitament d’activar a distància lo microfòn e la camèra, çò que faculta un espionatge considerable.
 
Demest los espionats i a l’actual president de la Generalitat e los tres precedents, dont Carles Puigdemont. L’article recòrda que Puigdemont es ara membre del comitat del Parlament Europèu que met en examen Pegasus. Justament,  aquel comitat s’amassèt pel primièr còp dimars passat.
 
La revista explica tanben que los independentistas catalans son, per ara, lo collectiu mai nombrós qu’aja patit una intrusion d’aquela sòrta. Tant los politicians catalans coma Citizen Lab son convencuts que l’espionatge es estat òbra del govèrn espanhòl. Pegasus es un logicial que solament lo pòdon crompar los govèrns.
 
Per ara, lo govèrn espanhòl a pas res dich, mas i a ja d’organizacions coma Amnestia Internacionala que exigisson d’el d’explicacions.
 
L’informacion provoquèt sulpic de reaccions d’indignacion e la convocacion d’un parladís dimars al Parlament Europèu ont i èran representadas totas las personas espionadas en aquela campanha de massa.
 
Vilaweb publica una lista de totes los politicians e jornalistas independentistas espionats.
 
 
Mai de 100 000 espionats
 
En julhet de 2020 raportàvem dins Jornalet, que mai d’una centena de personas èran estats espionats amb un logicial per telefòns intelligents que solament los govèrns dels estats podián aquerir. Un an pus tard, Microsoft desvelèt que los espionats èran mai de 100 000 e a publiquèt 50 000 numèros de telefòn piratats.


Un consòrci de sètze mèdias de pertot dich The Forbidden Stories a accedit a la lista de victimas d’aquel espionatge. Assabenta que las victimas son environ 180 jornalistas de païses coma Índia, Mexic, Ongria, Marròc e l’estat francés; e tanben d’activistas pels dreches umans, d’universitaris, d’entrepreneires, d’avocats, de mètges, de dirigents sindicals, de diplomatas, de politicians e qualques caps d’estat. Demest los espionats se tròban lo president de la Generalitat de Catalonha en exili, Carles Puigdemont, e plan d’autres independentistas catalans.
 
Entre los numèros de telefòn localizats per Microsoft, mai de 15 000 son en Mexic e son de jornalistas, de politicians e de dirigents sindicals e critics envèrs lo govèrn. Tanben i a un grand nombre de victimas de l’Orient Pròche dont Qatar, los Emirats Arabis, Bahrayn e Iemèn. S’es trobat fòrça numèros de jornalistas d’Índia, coma lo de Siddarth Varadarajan, fondador del jornal The Wire, un dels mèdias qu’a publicat l’informacion. Se mençona tanben lo telefòn de Szabolcs Panyi, jornalista d’investigacion del jornal ongrés Direkt36, qu’a tanben assabentat de la nòva.
 
Segon The Guardian, lo govèrn de Viktor Orbán en Ongria a emplegat l’esplech per espionar d’avocats, d’opausants politics e de jornalistas. De son latz, lo govèrn ongrés desmentís d’aver practicat cap mena d’espionatge. Pasmens, l’analisi del telefòn de Panyi a demostrat qu’aguèt lo telefòn contrarotlat per aquel logicial pendent sèt meses en 2019.
 
Las analisis d’Amnestia Internacionala an trobat tanben d’evidéncias que s’installèt lo logicial dins los telefòns mobils de la femna e de la filha del jornalista Jamal Khashuqji (sovent transcrich Khashoggi), assassinat dins lo consolat saudita d’Istambol en octòbre de 2018.
 

Macron espionat per Marròc
 
Entre los telefòns espionats n’i aviá un que lo president francés, Emmanuel Macron, emplega regularament dempuèi 2017, e tanben los numèros de l’èx-primièr ministre Édouard Philippe e de catòrze ministres del govèrn francés. Segon d’informacions publicadas per Le Monde, aqueles numèros de telefòn foguèron triats per un servici de seguretat de l’estat marroquin, utilizaire del logicial d’espionatge.


Installat amb un apèl vidèo de WhatsApp
 
Lo logicial s’introdutz dins lo telefòn mobil per mejan d’un apèl vidèo de WhatsApp que la victima i deu pas quitament respondre. Un còp que lo logicial es installat, los espions an accès a tot lo contengut del telefonet e pòdon quitament activar a distància lo microfòn e la camèra, çò que permet un espionatge considerable.
 
Aquel esplech d’espionatge es desvolopat per la societat israeliana NSO Group, qu’assegura que solament lo vendon als govèrns dels estats amb la tòca exclusiva d’espionar suspèctes de crimes o delictes grèus o de terrorisme.
 
 



abonar los amics de Jornalet

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Franc Bardòu
1.

Se me fau fabricaire d'armas, non me caldrà comparéisser davant lo mond tot estomacats se mas practicas, lèu o tard, se botan a tuar gents mercés a aquelas armas ! Un logicial d'espionatge es fait per espiar e espionar. Quina suspresa ! Per contra, aquò non lèva res a las responsabilitat dels estats espions. E gaireben totes los estats (aiceste "gaireben", non lo fau servir que per prudéncia intellectuala, que non o sabi tot) dispausan d'un servici d'espionatge.

Los ancians militants armats independentistas basques o còrses, los futurs resistents dins de guèrras d'ocupacion (coma per exemple en Ucraina a l'ora d'ara) o sabon ja despuèi longtemps. "Mon telefòn mobil e ma carta de credit son las armas fatalas del mieu enemic" ! Primièra operacion sul territòri del combat ? Se'n dispensar definitivament. Pel telefòn, vesi plan, mas per çò mai non capiti d'entreveire cossí opèran.

Bon, aquò dit : Espanha criptofranquista a espionat, espiona e espionarà encara los actors de l'independentisme catalan. E alara ? Quant lor costarà davant la justícia internacionala ? E qui los farà pagar ? E qué cambiarà puèi al militantisme independentista catalan ?

E perqué far pagar los conceptors de Pegasus ? I es escrit dessís : Pegasus, es a l'ustage dels pegasses. Non fòrçan degun ni a lo crompar, ni mens encara a n'usar ! Los pegasses que d'usan son solets responsables, me sembla. S'ai un accident d'automobila, non es Renault qu'assumirà mas eventualas responsabilitats seguent lo fait qu''aurai o non oltrapassadas las reglas del còdi de la rota, non ?

  • 14
  • 0

Escriu un comentari sus aqueste article