Eth 6 d’abriu, eths liceans qu’aprenguen occitan ath licèu Bagatelle de Sent Gaudenç (Nebosan), qu’anèren entara Ganaderia de Buròs. Que’s situa ena vilatge d’Escalans (Lanas Petitas), ath costat deth Mont de Marsan. Que i anèren entà descobrir era tradicion dera corsa lanesa e entà passar ua jornada en immersion lingüistica.
 
Era arribada qu’estèc plan calorosa. Eths liceans qu’estèren arrecebuts per Jean Barrère, mès conegut dab eth nom de Jan de Buròs; qu’ei tanben eth baile d’Escalans. Qu’èra sus eras chancas e que portava ua pèth de oelha. Entà començar, que parlèc de rugbi. Qu’ei un gran fan d’aqueth espòrt. Après, qu’expliquèc era istòria dera “ganaderia” .
 
Qu’ei ua persona plan estacada ara cultura gascona. Qu’a era passion deth eslevatge pr’amor qu’ei ua tradicion familiala. Aqueth eslevatge qu’estèc creat per son arrèrgranpair, en 1890. Qu’ei un bèth domeni, que i a 130 ha de prats, de bòsques e d’estanhs. Que i a vacas sauvatjas que son destinadas ara practica dera corsa lanesa. Que son vacas espanhòlas. Aqueth eslevatge que consèrva tanben eras raças lanesas, coma eras garias o eras oelhas.
 
Jan de Buròs que hec visitar eth eslevatge aths liceans, en tot hèr ua passejada en tractor, pendent era quala les presentèc Sauvada, qu’ei era oelha que s’estima mès.
 
Ena sua familha, que i a tanben era tradicion dera caça ara paloma. Que’s transmet de pair en hilh. Que consistís a gahar palomas dab hielats, sense tuar eths audèths. Entà aquò, que cau atirar eras palomas dab coloms domestics o en tot imitar eras palomas. Jan de Buròs qu’ei eth campion deth món deths “Rocolaires” despuish 2011.
 
Jan de Buròs qu’ei un gran passionat deras tradicions gasconas. Quan èra mès joen, que practicava era corsa lanesa.
 
 
Mès en qué consistís era corsa lanesa?
 
Que cau evitar ua vaca, en tot sautar per dessús o en tot hèr un escart eth mès pròishi possible dera bèstia. Jean Barrère qu’èra un escartaire. Era corsa lanesa qu’ei dangerosa e que i a sovent accidents. Jan de Buròs qu’a avut dus accidents.
 
Après, eths liceans qu’anèren véder eras arenas deth vilatge de Gavarret. Qu’estèren bastidas en 1914 peth arrèrgranpair de Jean Barrère: Joseph Barrère. Aqueras arenas que pòden arrecéber mila personas.
 
Aquera jornada que permetec de prénguer consciéncia deras diférencias enas tradicions que i a entram Comenge e eras Lanas; e que permetec tanben aths joens de hèr era coneishença d’ua persona plan implicada e passionada per aquera cultura, que hèr víver tot dia.
 
 
 
 
Line Guicquero, Zacharie Garbay-Abadie e Paul Vivot
Escolans de 2a 4 deth licèu Bagatelle de Sent Gaudenç
 
 
 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…