La Semaine du Minervois es un setmanièr que pareis cada dijòus e qu’assabenta de l’actualitat del territòri de Menerbés. Un territòri qu’a son identitat umana, culturala, istorica e agricòla, mas que l’istòria a trocejat e escartairat entre los departaments d’Aude e d’Erau.
 
Dempuèi 1997, 16 paginas d’informacion son porgidas a la populacion mercé als salariats e a un ret de correspondents e collaboradors, de la redaccion estant, installada a Olonzac. S’i ajusta cada an un numèro especial d’estiu.
 
Dempuèi la debuta, la dimension occitana es presa en compte. Dins cada numèro, se trapa una cronica en occitan (Papieròt menerbés), una cronica culinària en occitan (d’aquesta passa, una tièra «Dins la sieta de Corbièras e Fenolhedés» dins una accion comuna amb lo PNR Corbièras-Fenolhedés, IEO Aude e Ràdio Lenga d’Òc); una cronica de toponimia, bailejada per Ives Seguièr. L’actualitat culturala, literària e discografica d’òc es regularament seguida.
 
Lo jornal a realizat de numèros especials als moments dels recampaments occitans «Anem Òc!» o de la mobilizacion a respècte de la Lei Molac. S’i pòt ajustar una victòria militanta: l’empacha de tenguda d’un concors “Miss Catara” dins un vilatge pròche de Menèrba!
 
 
La crida
 
L’esquipa del setmanièr ven de lançar una crida a l’ajuda. Dins un corrièr, la còla lança un apèl a la solidaritat: “La Semaine du Minervois sosten e valoriza lo ret associatiu local, indispensable al vam del territòri. Cada setmana, lo jornal dobrís sas paginas a las associacions e se fa lo relèu de las actualitats, eveniments, manifestacions… Per quant de temps encara? O sabèm pas.
 
Çò que sabèm es que sens un sosten bèl e rapid, La Semaine du Minervois desapareisserà. Nos cal recampar unes 40 000 èuros d’aicí a la fin de mai.
 
Plan de mèdias de premsa escrita an conegut un esfondrament del nombre de vendas aquestes ans passats. Nòstre setmanièr es arribat a téner còp, mercé a l’aument del nombre d’abonats. Ça que la, malgrat de salaris a minima, nòstre engatjament e lo dels correspondents, malgrat lo sosten dels anonciaires, nòstre equilibri financièr se degradèt en 2021. Patissèm una baissa del nombre de las vendas, l’aument del còst del papièr dels transpòrts, e de la distribucion: amb una baissa de las ajudas a la premsa, aquò met en grand dangièr l’avenir de nòstre jornal.”
 
 
Una canhòta de sosten e d’espèr
 
Pasmens, los projèctes son pas de manca: se prepara lo numèro especial d’estiu tirat a 10 000 exemplars; se trabalha a una version novèla del sit Internet amb possibilitat d’abonament a una version numerica e accès als archius, etc.
 
Un numèro especial farà lo punt sus l’istòria del setmanièr. Per contunhar l’aventura, los legeires ocasionals son convidats a s’abonar e una canhòta Leetchi es dobèrta sus www.leetchi.com/c/les-cahiers-du-minervois.
 
 
 
 
Alan Roch