Una còla scientifica prepausa ara çò que poiriá èsser lèu lo procès de reviscolament d’una espècia escantida, lo tilacin, tanben conegut coma tigre de Tasmania. Per o realizar, an fach una lista de fins a nòu ponches per recomandar cossí se pòt reviscolar aquela espècia que patiguèt l’extincion en 1936.
 
Lo tilacin, o lop marsupial de Tasmania, fasiá fins a 180 centimètres de longor e fins a 58 cm de nautor. Lo mamifèr semblava mai un amassada de divèrsas espècias qu’una espècia pròpria. Aviá de regas sus sa forradura e tanben èra un marsupial pauc comun pr’amor que los dos sèxes avián una pòcha abdominala per sonhar los pichons.
 
Lo registre fossil confirma que nasquèt coma espècia fa aperaquí 4 milions d’annadas en Austràlia e qu’auriá subreviscut dins l’illa de Tasmania fins al començament del sègle XX. Mas lo tilacin subiguèt una òrra caça de part dels umans que menèt al masèl de milièrs d’especimens entre 1830 e 1914 en nom de la defensa dels territòris de las nòvas bòrias dels colons. Lo darrièr especimen moriguèt en 1936 e lo tigre de Tasmania foguèt declarada espècia escantida en 1982.
 
“L’environament ont visquèt lo tigre de Tasmania a pas brica cambiat, çò diguèt Andrew Pask, de l’Universitat de Melbourne. Aquò vòl dire qu’avèm de condicions idealas per lo reviscolar e reïntroduire dins son ecosistèma natural. Mas per o poder far cal d’argent”.
 
 
L’arribada de l’argent
 
E aquò es çò qu’es arribat als cercaires après qu’un ciutadan donèt fins a 5 milions de dollars australians per aquela meteissa tòca. E, dempuèi alavetz, los cercaires, dirigits per Pask, comencèron de bastir un laboratòri per assajar de reviscolar geneticament aquela espècia, uèi mòrta. La tòca seriá de reviscolar divèrsas espècias marsupialas amb l’ajuda de la tecnologia mai modèrna.
 
La persona que balhèt l’argent, Russell Wilson, volguèt soslinhar perqué o aviá fach: “L’istòria dels tilacins es una istòria plan trista. E après la descobèrta de çò que voliá far Pask, caliá far reüssir son trabalh. La nòva tecnologia genetica es estonanta e se pòt reviscolar mai d’una espècia escantida”.
 
Per ansin, Pask e sos collègas an confirmat una lista de nòu ponches de seguir per poder reviscolar una espècia marsupiala escantida coma lo tigre de Tasmania. Lo primièr pas es trobar lo còde genetic de l’animal, çò que ja èra fach, puèi cal sequenciar geneticament d’espècias marsupialas pròchas del tilacin, e aquò tanben o an fach los cercaires.
 
Lo tresen ponch es crear una basa de donadas bioinformaticas per poder restacar lo genòma del tilacin amb d’autras espècias marsupialas pròchas. E aquò es un procès que los cercaires son a mand de finir. Puèi, amb lo Conselh de Recèrca Australian, los cercaires vòlon desseparar de cellulas maire del tilacin en mai d’autras espècias marsupialas. Amb aquò los cercaires an la volontat de crear una banca de la biodiversitat marsupiala per protegir d’espècias marsupialas uèi en situacion critica.
 
Pels ponches 5 a 7, es de besonh de desvolopar un programa de tecnologia reproductiva per marsupials en laboratòri. Per o realizar, los cercaires fan servir de cellulas vivas per crear un embrion e après lo metre dins l’utèr d’una espècia marsupiala. Los darrièrs ponches soslinhan que cal noirir amb de lach los pichons nascuts amb l’ajuda umana e aital melhor ajudar a lor subrevivéncia. Sonque aquò poiriá assegurar la capitada de la nòva espècia reviscolada. (Legissètz la seguida).




 

---

Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion.  Podètz legir l'article entièr aicí.