Aqueste mes de març que comença es important pels mèdias occitans. Se lo 31 de març Jornalet celebrarem lo nòstre primièr anniversari, la version numerica de La Setmana es ja a festejar lo sieu. En aquela escasença an montat un periòde de “pòrtas dobèrtas” del 1r al 10 de març.

La Setmana es un setmanièr d’informacion generala, redigit integralament en occitan e creat en 1995 per Dàvid Grosclaude. Es publicat per la societat Vistedit a Lescar (Bearn) e publica de nòvas d’informacion generala, culturala, sociala e economica d’Occitània e del Mond dempuèi una perspectiva occitana.
 
Fa un an justament, e après superar de nombrosas dificultats administrativas amb l’Estat francés, mai que mai per l’usatge exclusiu de la lenga occitana, La Setmana faguèt lo saut vèrs l’encastre numeric, en tot completar la version de papièr.
 
Aura Séguier, webmestressa del sit, explica que lo numeric es un bon complement al papièr pr’amor que lo legeire a l’oportunitat de veire de vidèos o d’escotar d’àudios restacats. Pasmens, sonque 25% dels lectors son comuns a l’edicion de papièr e abonats a l’edicion d’Internet, çò qu’es un indicador que lo public de l’edicion numerica es fòrça nòu. Per contra, i a un pauc mai de cent abonats perque lo mond son pas acostumats a pagar sus Internet. Dins aquel sens, los redactors de La Setmana fan una crida a s’i abonar, e aital se poiriá contunhar d’ofrir un jornalisme de qualitat.
 
Son a festejar lo primièr anniversari amb un periòde de pòrtas dobèrtas fins al 10 de març. Aquò vòl dire que, fins a aquel jorn, totòm ne poirà legir los contenguts liurament.
 
L’aventura cibernetica del setmanièr occitan la lancèron Clamenç Pech e Aure Seguier, dos jornalistas professionals, mai que mai del mitan de la ràdio, que trabalhan en malhum amb la Federacion Interregionala dels Mèdias Occitans (FIMÒC). Gràcias a aquela interrelacion, los sòcis de la FIMÒC jògan lo ròtle dels correspondents locals, en escambiant d’informacions de totes los parçans d’Occitània e en portant fòrça material multimèdia.
 
Vistedit publica tanben d’autras publicacions, ont cal soslinhar Plumalhon, una publicacion per enfants e adolescents, e Papagai, qu’es un mesadièr pels mai petits ont las istòrias son tanben enregistradas e se pòdon escotar per Internet.
 
A la fin de l’an, La Setmana farà espelir una aplicacion per iPhone.
 
 
Setmana de la premsa a l’escòla e concors de readaccion d’articles
 
Vistedit participa aqueste mes de març a la setmana de la premsa a l’escòla. Pendent aquel periòde, totas las escòlas e licèus qu’o demandaràn, auràn l’accès gratuit a La Setmana e los articles seràn mai adaptats als escolans.
 
De mai, an dobèrt un concors de redaccion d’articles en occitan per las escòlas fins al 20 d’abril. Alavetz, los professors poiràn trabalhar los articles pendent la setmana de la premsa a l’escòla e, en seguida, poiràn far obrar los escolans per participar al concors. Lo reglament e los prèmis son publicats al sit web de La Setmana.