L’Union Europèa aurà gaireben tres còps mens de bòrias d’aicí a 2040, es a dire que dins los 20 ans venents 6,4 milions de tenements agricòlas seràn perduts. O anóncia un estudi del Parlament Europèu entitolat L’avenir del modèl de bòrias en Euròpa, çò rapòrta Reporterre que cita La France Agricole. Se confirma, per tant, la diminucion del nombre de bòrias, qu’entre 2003 e 2016 passèt de 15 a 10 milions e amb la desparicion de las bòrias de mens de 5 ectaras.
 
Las principalas victimas d’aquela extincion de massa, segon l’estudi, son las petitas bòrias de mens de 4 ectaras dels novèls estats membres de l’èst e del sud d’Euròpa. La produccion se concentrariá dins de grands tenements intensius.
 
Los autors de l’estudi senhalan la politica agricòla comuna, car “sa reparticion de sos fonzes e de sas mesuras es orientada devèrs las questions economicas e favoriza en consequéncia los grands tenements intensius, agreujant lo movement de concentracion dictat per las fòrças del mercat”.
 
Pertocant las mesuras començadas per remediar a aquel fenomèn, los autors del rapòrt encoratjan de dobrir las politicas agricòlas a “una mai granda diversitat dels perfils d’agricultors actuals e emergents” e preconizan “una revision generala de la politica agricòla e una mai granda orientacion devèrs las mesuras de desvolopament rural”.