Deth 3 ath 25 de junh, daguens eth hestau Total festum, sostengut pera region dita Occitània, era associacion comengesa que va multiplicar eras accions au près deras escòlas e deras gents de Comenge e Varossa.

Perqué Eth Ostau Comengés s’interèssa ad aquera tradicion?
 
Que volem sauvar e transméter eth nòste patrimòni culturau immateriau. Aqueste que s’articula ath torn dera nòstra lenga, eth occitan, ena sua varietat gascona, e tanben de totas eras costumas e saber-hèr deth nòste territòri. Demest eras hèstas tradicionalas, era celebracion deth solstici d’estiu qu’é era hèsta collectiva era mès importanta deths Pirenèus. En 35 comunas de Luishonés e Varossa, qu’é inscriuta ena lista arrepresentativa deth patrimòni culturau immateriau dera umanitat pera UNÈSCO. Qu’é ua reconeishença fòrça prestigiosa.
 
 
Concretament, quau ei eth nòste trebalh?
 
Que cercam documents d’un còp èra, que cuelhem testimoniatges, que prenguem fotografias deths hars e deths halhars, que conselham eths organizaires, qu’intervenguem enas escòlas entà presentar era nòstra exposicion sus era Sent Joan e animar talhèrs sus eths sons primitius qu’acompanhan eth huec e qu’organizam conferéncias de cap aths abitants. Despuish era reconeishença pera UNÈSCO, en 2015, qu’avem constatat que quauques organizaires cèrcan mès a copiar eras tradicions d’autis parçans, o a inventar de navas practicas “hòra-sòu”, mèslèu que de valorizar era sua identitat. Qu’é pr’amor d’aquò qu’avem causit d’intervénguer en Luishonés e en Varossa, mès tanben enas comunas que son en dehòra deth perimètre UNÈSCO pr’amor eras suas tradicions que son autan plan dignas d’interès se son estudiadas coma cau, compresas e arreviscoladas.
 
 
Quau ei eth programa dera edicion 2022? 
 
Qu’avem previst un pialèr d’accions culturalas de proximitat, a compdar deth 3 de junh. Que serà coma un hestau “esparricat”. Dus especialistas deth patrimòni culturau immateriau, Bernat Ménétrier e Matiu Fauré, qu’animaràn siés mediacions escolaras e siés conferéncias enaths abitants, seguidas, de còps d’un concèrt, damb era participacion de grops que botan endavant eths instruments, eras musicas e eths cants deths Pirenèus Gascons. Que i aurà tanben era cramada deth har, en tres comunas diferentas.
 
 
 
 
Joan Pau Ferré
 


 

---

Entà anar mès luenh:https://www.ostaucomenges.org/har.php