Mièg milion de portugueses manifestèron per las carrièras de Lisbona dissabte passat, de ser, per clamar contra las reduccions budgetàrias del govèrn. De familhas, de professionals, de caumaires, de politicians e de sindicalistas participèron a las manifestacions, convocadas pel movement ciutadan Que se Lixe a Troika (Que se Fota la Tròica), contra las mesuras d’austeritat impausadas per la Banca Centrala Europèa (BCE), lo Fons Monetari Internacional (FMI) e la Comission Europèa. Los mèdias portugueses considèran que foguèt la manifestacion mai multitudinària dels darrièrs dos ans.
 
La plataforma ciutadana contra la tròica aviá ja amassats de centenats de milièrs de manifestants en setembre passat. Aquela foguèt considerada la manifestacion mai granda de l’istòria de Portugal e s’es vist ara superada per aquesta nòva demostracion d’indignacion.
 
Dins aquesta escasença, la mobilizacion coïncidiguèt amb la preséncia dins la capitala portuguesa dels representants de la Comission Europèa, de la BCE e de l’FMI, que fan la setena avaloracion de çò qu’eles apèlan un “programa d’assisténcia financièra”.
 
Lo lèma de la protèsta èra “Es lo pòble que comanda”, un dels vèrses de l’imne de la Revolucion de las Girofladas de 1974, Grândola Vila Morena, que faguèt tombar la dictatura e qu’es vengut lo simbòl de l’indignacion ciutadana.
 
La cançon la cantèron a la fin de la marcha, dins la Plaça Terreiro de Paço, la mai granda de la capitala portuguesa, e dins un vintenat de grandas vilas del Mond, dont cal soslinhar Barcelona, Boston, París, Londres, Atenas e Estocòlme, segon los organizaires.