La correspondenta d’Al Jazira en Cisjordania, Shireen Abu Akleh, l’an tuada d’una bala dins lo cap mentre qu’informava de las incursions de las tropas israelianas dins la vila de Janin. Segon de vidèos e de testimoniatges de sos collègas, portava un gilet parabalas e un casco amb lo mot “premsa”. Un dels testimònis es lo jornalista Ali Asmoadi, del jornal Quds, qu’a recebut una bala dins l’esquina. Al Jazira ne jutja responsabla l’armada israeliana: “Es clarament un assassinat en violacion de las leis e nòrmas internacionalas, las fòrças d’ocupacion israelianas an tuat de sangfreg la correspondenta”.
 
Abu Akleh èra una jornalista palestiniana que trabalhava per Al Jazira dempuèi longtemps. Aviá 51 ans.
 
Lo ministre dels afars exteriors israelian, Yair Lapid, a prepausat a las autoritats palestinianas una enquista conjoncha. “Los jornalistas an d’aver una proteccion dins las zònas de conflicte e avèm la responsabilitat de conéisser la vertat”, çò diguèt sus son compte de Twitter. Ça que la, Lapid precisèt que “las fòrças de seguretat contunharián d’operar aquí ont seriá de besonh per evitar lo terrorisme e l’assassinat de maites israelians”. Son ministèri a dich sus Twitter que considèra probable que l’ajan tuada “de terroristas en tirant d’un biais indiscriminat”.
 
De son caire, lo president palestinian, Mahmud Abbas, condemnèt dins un comunicat aquel “crime d’execucion de part de las fòrças d’ocupacion israelianas”, e precisa que son executiu “ne jutja plenament responsable lo govèrn israelian d’aquel crime atròç, que fa partida d’una politica quotidiana de l’ocupacion”. Per Abbas, “fa partida d’aquela politica de l’ocupacion d’atacar los jornalistas per amagar la vertat e cometre de crimes en silenci”.