Las tarifas de l’SNCF (la societat ferroviària francesa) per partir en vacanças d’ivèrn son fòrça mens caras a la partença de París qu’a la de las vilas d’Occitània e d’endacòm mai, e las reduccions son mai favorablas a las familhas qu’als viatjaires regulars o als joves. Aquò es lo resultat d’una enquèsta (que podètz trobar çai joncha) de l’associacion francesa de consumaires CLCV, publicada divendres passat.

L’enquèsta, realizada sus una mòstra de trajèctes per una partença lo 1r e lo 2 de març cap a las principalas estacions d’espòrts d’ivèrn, mòstra que las partenças de París son plan mens caras que las partenças de las principalas vilas occitanas (e d’endacòm mai); la diferéncia de prètz va fins a 32,5% per la tarifa “mens cara” e es de 9% per la tarifa mejana.
 
Es un resultat que, segon la CLCV, es “logic”. O justifican en disent que “los trens que partisson de París comptan probable mai de viatjaires, çò que permet de melhor amortir los còstes fixes e de prepausar un prètz bas”. L’observacion de las tarifas redusidas (joves de 12 a 25 ans, seniors, familhas nombrosas, frequéncia) mòstra que la reduccion se plaça entre 21% e 38% per una mejana d’aperaquí 30%.
 
Aquela inegalitat de tarifas foguèt ja verificada per una enquèsta precedenta suls trajèctes estivals.
 
“L’objècte de l’estudi es de saber quala es la tòca d’aquela grasilha tarifària que, segon nosautres s’adreiça puslèu a de gents mobilas, internautas e demorant a París qu’a de familhas de província [sic]”, çò expliquèt a l’AFP Thierry Saniez, delegat general de la CLCV.
 
Sus un vintenat de destinations estudiadas, la CLCV a analisat las tarifas a tres meses, dos meses e un mes abans la partença (720 tarifas). Dins lo resultat, se pòt veire qu’es mai avantatjós de prene la bilheta amb tres meses d’avança. La tarifa “mens cara” tend a créisser fòrça rapidament d’un mes a l’autre (per exemple, 19% entre una reservacion a tres meses e una a dos meses per una categoria normala).
 
Per contra, per las estacions d’esquí, “fòrça trens son complets, quitament tres meses a l’avança”, çò disiá Saniez, que qualificava de “criticabla” aquela inegalitat tarifària, perque avantatja los usatgièrs que mestrejan Internet o qu’an de temps liure.