Vos anam parlar de nòstra cara licéncia d’occitan a l’Universitat Pau Valèri de Montpelhièr que nos ten al còr. Per nosautres, es una licéncia importanta que fa partida de l’avenidor per la lenga occitana. E al fial del temps, los estudiants se fan escasses. Amb aqueste article, esperam de faire venir de mond per nos succedir.

Per començar, cal saber que l’occitan es pas una lenga mòrta! (Coma o diguèt un de nòstres collègas a de mond dins lo tram: “Avètz l’impression que soi mòrt?”) Nòstra lenga, fa partida de las lengas latinas, e aquò es una bona causa per nosautres! Sabètz perqué? Perque las lengas romanicas que son l’occitan, lo francés, l’italian, l’espanhòl etc., an las meteissas rasics. E per tant l’apròchi de las lengas es mai aisit. L’occitan a per exemple mai d’una semblança amb l’espanhòl e l’italian. Per vos provar que nòstra lenga es ben viventa, vos anam presentar nòstras matèrias:
   
 
L’ambient
 
L’ambient dins la licéncia d’occitan es mai familial que per las autras, perque sèm pas fòrça dins la classa. D’efièch, es mai aisit de charrar amb totes, tant amb los professors coma amb los estudiants.
 
Los professors son mai presents per nos ajudar dins nòstre percors. Per nos sosténer dins nòstres devers, per nos balhar de conselhs per nos melhorar, a l’escrich coma a l’orau… Nos balhan de conselhs sus l’avenidor e lo percors de faire après la licéncia tanben. Son a l’escota de nòstres dobtes.
 
Vos podètz tanben faire un rapid retrach de nòstres professors per vos balhar una idèa de perque son tan genials. Fan fòrça causas per la lenga, a despart de l’ensenhar a l’universitat o encara dins lo second gra coma o fan quauques unes d’entre eles. Avèm un professor qu’es cantador, d’autres qu’escrivon de libres, d’autres encara qu’an obtengut l’agregacion en occitan… Son de vertadieras personalitats dins lo mond de l’occitan, e sèm encantats de los conéisser! Es un onor!
 
Un autre bon ponch per nosautres es nòstra Bibòc! Nòstra Bibòc es una bibliotèca normal        a, mas qu’a mai d’una foncion, que los estudiants las avèm inventadas! Fasèm servir la bibliotèca d’occitan coma un luòc per manjar. Es un vertadièr endrech de convivialitat per charrar, mas tanben un endrech de trabalh. E i podèm anar quand o volèm se trobam qualqu’un qu’a la clau!
 
Amb tot çò que venèm de vos dire, vos podèm afirmar qu’aquesta licéncia nos va vertadièrament mancar!
 
 
L’Avenidor
 
Amb la licéncia d’occitan, avèm la possibilitat de venir professor, tant dins lo primièr coma dins lo segond gra, e aquò tre la fin de la licéncia! Après, podèm faire un mastèr per puèi passar lo concors (CRPE per lo primièr gra; CAPES per lo segond gra), per aver l’estatut oficial de professor.
 
Mas i a evidentament mai d’un mestièr en mai de professor!
 
Coma per exemple trabalhar dins los archius al CIRDÒC de Besièrs, o encara èstre traductor, escriure de libres, los editar dins d’ostals d’edicion...
 
 
 
 
Morgana Privat e Èlsa Degardin

 

 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…