La preparacion parlamentària de la lei francesa de l’educacion a motivat una capitada istorica dels defensors de las lengas minorizadas. Lo 27 de febrièr passat, la comission de l’Assemblada Nacionala que tracta la question aprovèt la majoritat de las proposicions e emendaments prepausats per 18 associacions de parents e ensenhaires. Son de grops partisans d’una preséncia normalizada d’aquelas lengas dins lo sistèma educatiu de l’estat e se coordenan dins la Federacion per las Lengas Regionalas dins l’Ensenhament Public (FLARÈP).

Aquelas associacions èran preocupadas pels trabalhs prèvis de redaccion de la lei e demandavan una accion politica clara en favor del patrimòni cultural de l’estat, en la linha de las promessas electoralas del president de la Republica. Dins aquel sens, consideravan que la nòva lei èra una escasença per metre a jorn definitivament la question de las lengas minorizadas e demostrar a l’opinion publica e als organismes internacionals la volontat de França de velhar sul sieu patrimòni lingüistic.
 
La comission aprovèt aqueles principis e acceptèt l’inclusion especifica de las lengas mal nomenadas “regionalas” dins la redaccion de la lei. Se farà tanben mençon especifica de l’ensenhament d’aquelas lengas mas, pereu, e aquò es important, se favorirà que d’autras matèrias sián ensenhadas dins aquelas lengas “regionalas” long de tot lo cicle educatiu. Per o garentir, la lei preveirà que los mèstres intègren aquelas lengas dins los lors programas educatius. De mai, e a la demanda de dos deputats (lo socialista Vlody e la comunista Buffet), s’es aprovat maitot un emendament per que los ensenhaires dels territòris d’otramar sián formats en creòl per fin de s’adaptar melhor a la situacion lingüistica d’aqueles territòris.
 
De fonts de la FÈLCO an assegurat a Jornalet que s’agís d’una “polida victòria del trabalh pacient e collectiu”. Segon las meteissas fonts, a l’ora d’ara, es practicament assegurada la mençon explicita de las lengas minorizades dins la futura lei, çò que fins ara èra pas aital. Las dètz e uèch organizacions amassadas jos la meteissa plataforma comprenon de representants de totas las minoritats nacionalas de França. De bretons, d’alsacians, de còrses, de catalans, de flamencs, de bascos, d’arpitans savoians e d’occitans, e tanben de representants de l’illa de la Reunion, que se son organizats per se defendre mutualament davant l’Assemblada Nacionala, en demostrant que l’unitat d’accion es lo camin mai eficient per capitar d’objectius concrets.