Las autoritats d’Índia an enebit l’exportacion de blat. Se vòl garentir de resèrvas alimentàrias pels 1,4 miliard de ciutadans e evitar una pojada exagerada dels prèses. La produccion d’aquela cereala a patit una fòrta davalada a causa de la calorassa excepcionala.
 
Ara, lo G7 avertís d’un risc de famina mondiala. D’un caire, èra lo segond exportator de blat de la planeta après China. De l’autre, l’invasion russa d’Ucraïna a mes fin al 30% de las exportacions mondialas de blat. Los païses del G7, amassats en Alemanha, an criticat la decision d’Índia perque farà pojar los prèses del blat d’un biais que los païses pus paures ne seràn completament privats. Segon lo darrièr rapòrt d’Oxfam Intermón, lo nombre de personas en pauretat extrèma creisserà ongan de mai de 260 milions e lo risc de patir de desnutricion ne va tocar 827 milions.
 
 
Russia menaça d’“una famina brutala”
 
La ministra dels afars estrangièrs d’Alemanha, Annalena Baerbock, a dich que i a 25 milions de tonas de blat blocadas dins los pòrts ucraïneses e que Russia se servís d’aquelas cerealas per menaçar “d’una famina brutala” coma “damatge collateral” de las sancions economicas. “Existís la menaça d’una famina brutala. Cal pas èsser ingenús. Mas aquò es pas un damatge collateral. Es un instrument causit deliberadament”, çò a precisat.
 
 
Indonesia a enebit l’exportacion de l’òli de palma
 
En mai de tot aquò, Indonesia enebiguèt l’exportacion d’òli de palma a la fin d’abril. De precisar que n’es lo principal productor planetari. Lo govèrn del primièr ministre Joko Widodo vòl garentir aital lo provesiment local e arrestar la pojada dels prèses causada per la pandemia de la covid-19 e la guèrra d’Ucraïna.
 
Aquela mesura a tanplan fach pojar los prèses dels aliments dins lo Mond entièr.