Aquesta dimenjada, uèit finalas se jogaràn a Narbona per aquelas jornadas entitoladas "la Prima del XIII": sièis al Pargue dels Espòrts e de l’Amistat: dissabte de vèspre, las finalas d’Elèit 2 e Elèit 1 femenina (en Elèit 1, novèl afrontament Divessas Catalanas-l’Escura) e dimenge: 4 finalas (los U15 a 10h; los U17 a 11h; los U19 Tolosa contra Catalans-Sant Estève a 13h, e la finala d’Elèit 1 entre Carcassona e Limós a 15h30). Las doas finalas de XIII-cadieral se debanaràn dissabte en fin de vèspre dins la sala de l’Arena.

Elèit 1: Carcassona o Limós: per quala esquipa lo bloquièr?
 
A Carcassona e Limós, es lo temps dels preparatius. De las esquipas de segur amb d’entraïnaments e d’analisis vidèo per veire cossí contrar lo jòc de l’adversari. Los desplaçaments en bus se preparan, las saquetas ajudaràn los sostens a téner còp, las musicas seràn de la partida, mas dimenge de ser, ont serà lo bloquièr, a Carcassona o a Limós? Nos azardarem pas a faire de pronostic. Just, desirar de viure una granda finala.
 
En Elèit 2, se jogava los barratges: dissabte, Vilagalhenc-Argon dominèt l’Escura 49-12  e dimenge Illa passèt l’obstacle Entraigas: 34-16. Tres formacions catalanas son en mièja finala qu’opausaràn dins una quinzenada Baó e la formacion de Cabardés d’un caire e Pià e Illa d'autre caire.
 
En U19, la finala de la Copa Nitard se jogarà entre los catalans, qu’an eliminat Tolosa en mièja finala 20-18, e Carcassona qu’es anat quèrre la qualificacion a Selon de Provença 40-28.
 
En Nacionala, la finala opausarà Tonens e Realmont, doas esquipas qu’an una longa istòria tretzista.
 
 
Superliga: las cargas de l’oncle Sam
 
Dissabte, los Dragons recebián a Brutus los Lops de Warrington. La partida foguèt equilibrada fins a la 55a minuta: 8-8, mas lo final virèt al festenal catalan amb cinc ensages marcats, dos sortits de doas cargas fenomenalas de Sam Kasiano. Amb aquesta victòria 40-8, los catalans s’installan a la segonda plaça del classament de la Superliga.
 
Dimenge, a Ernèst Wallon, lo Tolosa Olimpic se balha de rasons d’esperar en signant sa segonda victòria de la sason e contra un adversari dirècte pel manten: Wakefield. Victòria occitana: 20-14 .
 
Divendres, los tolosans jogaràn a Huddersfield. Desplaçament tanben pels catalans: seràn opausats a Hull KR dimenge a una ora e mièja del vèspre.
 
Autra bona novèla pels Sang e Aur: la qualificacion de la formacion dels Andidragons per la finala de la Challenge Cup de XIII-cadieral. Victòria 30-6 fàcia a Wigan e finala de jogar lo 25 de junh contra Leeds.
 
 
NRL: las Pantèras an recuperadas las urpas
 
En Austràlia, las 8 partidas del Magic Round se joguèron a Brisbane de divendres a dimenge. Cèrtas partidas foguèron plan disputadas: victòria dels Lapinons fàcia als neozelandeses 32-30, dels Titans fàcia a Sant Jòrdi 20-16 o dels Pols contra las Anguialas: 31-24 .
 
D’autras se revelèron mai desequilibradas: Brisbane ganha 38-0 contra Manly  e los Vaquièrs dominan los Tigres: 36-12.
 
La setmana passada, Penrith aviá daissada la primièra plaça del classament a Melbourne, mas dissabte la tornèt prene amb una larga victòria 32-6 sul primadièr efemèr.
 
 
 
 
Alan Roch