L’Institut Superior de las Lengas de la Republica Francesa (ISLRF) e lo ret dels Insituts Superiors del Professorat e de l’Educacion (INSPE), que forma los ensenhaires, an signat una convencion quadre per la formacion dels ensenhaires de Calandreta e dels autres establiments escolars de l’estat que fan d’immersion en lengas autras que lo francés. Aquela signatura, que se faguèt lo 13 de mai passat a l’Ostal de las Universitats de París, garentís la seguida dels establiments immersius coma Calandreta e permet de virar la pagina de maites blocatges a la formacion dels ensenhaires.
 
Segon un comunicat de l’ISLRF, la signatura se tenguèt après una convèrsa fòrça qualitosa entre los partenaris, e representa “una bèla avançada per la formacion dels ensenhaires dels establiments immersius en lengas regionalas”.
 
Aquela formacion se farà pels ensenhaires de 6 lengas: alsacian amb ABCM-Zweisprachigkeit, basco amb Seaska, breton amb Diwan, catalan amb La Bressola, còrs amb Scola Corsa e occitan amb Calandreta. L’ISLRF ne coordena la formacion iniciala e assegura lo ligam amb lo Ministèri francés de l’Ensenhament Superior e de la Recèrca.
 
La convencion foguèt signada pel president del ret dels INSPE e director de l’INSPE de París, Alain Frugière, e pel president de l’ISLRF, Joan-Loís Blenet, en preséncia de la presidenta d’ABCM Zweisprachigkeit, Karine Sarbacher, e del director de Diwan, Gregor Mazo. Lo president del ret dels INSPE èra acompanhat de la vicepresidenta, directritz de l’INSPE de l’illa de la Reünion, Sandrine Marvilliers, e de la delegada generala del ret, Anne-Lise Rotureau.