capçalera campanha

Actualitats

EscòlaInternacionalPolitica

Seaska a sasit la justícia per exigir que los examens se pòscan realizar en basco

La federacion d’escòlas immersivas del Bascoat Nòrd planh que lo Ministèri de l’Educacion manque a l’acòrdi signat en 2019

Tèxte legit

Seaska a sasit pel primièr còp la justícia per exigir que los examens se pòscan realizar en lenga basca. La federacion de las escòlas immersivas de basco en Bascoat Nord, dichas ikastolas, denóncia que lo Ministèri de l’Educacion nacionala es a contravenir a l’acòrdi signat amb Seaska e l’Ofici Public de la Lenga Basca.
 
L’audiéncia comencèt ièr a 15h30 al tribunal administratiu de Pau e s’espèra que son verdicte se farà public abans lo 20 de junh.
 
La rason d’aquela denóncia l’explica sus Mediabask lo president de Seaska, Peio Jorajuria:
 
“Signèrem una convencion en 2019 valida fins a ongan, que precisa per escrich —lo rectorat s'i es engatjat— que totes los escolans poiràn passar una part del grand oral en lenga basca. [...] La rectritz [de l’acadèmia de Bordèu], qu'avèm encontrada aquestas setmanas, fa pas la meteissa lectura que nosautres e vòl limitar aquel drech de presentar lo grand oral en lenga unicament als escolans qu’an causit l'especialitat lenga regionala al bachelierat. Valent a dire que suls 100 bachelièrs que presentarem ongan, solament una desena seràn autorizats a far una part del grand oral en lenga basca. E lo 90 % de nòstres escolans poiràn pas, a cap de moment, utilizar la lenga basca durant lo bachelierat. Es una enòrma reculada per nosautres, un desengatjment de l'estat. Aquò es pas acceptable!”
 
Seaska denóncia la rectritz de l'Acadèmia de Bordèu, Anne Bisagni-Faure, per aver reïnterpretat la convencion signada lo 16 de julhet de 2019 pel rector d’alavetz, Olivier Dugrip, per Seaska e per l’Ofici Public de la Lenga Basca.
 
“Per nosautres, i a pas d'espaci d'interpretacion. Es una causida politica qu'es facha per l'Educacion nacionala de refusar aquel drech que foguèt concedit en 2019”, çò precisa Jorajuria. Dempuèi lor introduccion per la nòva reforma del bachelierat de 2021, las espròvas del grand oral an pas encara agut luòc, en rason de la pandemia de la covid-19. Se tendràn pel primièr còp a la fin del mes de junh.
 
En mai de tot aquò, Seaska tanben planh de gròssas reculadas:
 
“Fins fa gaire, l'espròva del brevet se fasiá entièrament en basco per totes nòstres escolans, e sus l'espròva del bachelierat aviam doas espròvas escrichas, l'istòria-geografia e las matematicas, que nòstres escolans èran autorizats a la redigir en lenga basca. Aquestes tempses, avèm agut de gròssas reculadas. Es desenant enebit a nòstres escolans de redigir l'espròva de las sciéncias del brevet en basco, e pel primièr còp ongan, cap d’espròva escricha del bachelierat es pas autorizada a èsser redigida en basco”.
 
 


abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Franc Bardòu
2.

#1 Los Basques fan pòble, mentre que nosautres, fasèm pietat, cadun dins son caton…

  • 1
  • 0
Auda
1.

Un pau d'arsec militant, que hè plaser! Nosautes, qu'ei precisament çò qu'avem perdut....

  • 12
  • 0

Escriu un comentari sus aqueste article