“Las zònas escuras” es lo títol del dorsièr de uèch paginas que publiquèt dissabte passat Le Journal du Pays Basque, qu’analisa exaustivament l’afar de Jon Anza, lo militant d’ÈTA que desapareguèt en abril de 2009 e que son còrs lo trobèron dins una mòrga de Tolosa onze meses puèi. La recèrca oficiala de l’estranha desaparicion e mòrt risca d’èsser classada, mas lo reportatge del jornal basco balha un pauc de lum a l’afar e denóncia qualques errors policièras e judiciàrias.

Dins aquel dorsièr, lo jornal examina tot çò que se sap que se passèt pendent los onze meses qu’Anza foguèt desaparegut e lo temps de la recèrca posteriora; se pausa qualques questions que contunhan d’aver pas cap de responsa; e met en evidéncia qualques donadas nòvas que remeton en causa la version oficiala dels policièrs.
 
 
Totes los espitals en sonque doas oras?
 
Entre las questions que pausa lo jornal basco, i a lo ròtle que joguèt la Sosdireccion Antiterrorista (SDAT). Lo 20 de mai, l’agent de Baiona (Bas Ador), Franck Ayçoberry, sollicitèt per fax que se verifiquèsse se i aviá qualque pacient amb lo nom de Jon Anza dins los espitals de Baiona e Tolosa, o se qualque persona non identificada correspondiá a la fòto que mandava joncha.
 
Dempuèi Tolosa, respondèron que i aviá pas agut “cap d’admission dins los establiments de Ranguèlh, Purpan, Larrey e Psi Marchand”. Aquela nòta foguèt mandada per e-mail per un autre agent policièr nomenat Julien Decoux. Ça que la, dins lo dorsièr judiciari i a totas las demandas a d’espitals e las responsas correspondentas, mas pas las de Tolosa.
 
Los autors del reportatge se demandan cossí explica, Decoux, las responsas negativas dels espitals a una question que lor èra pas estada pausada. Los estona tanben, als reportaires, que lo messatge foguèt mandat dempuèi Baiona doas oras après que s’èra recebut la demanda d’Ayçoberry. “Cossí se faguèt per percórrer totes los espitals en doas oras, en prenent en compte que los espitals balhan pas aquel tipe d’informacion ni per telefòn ni per fax?”, çò se demanda lo jornal. Çò segur, segon çò que rapòrtan, es qu’aquel jorn, lo 20 de mai de 2009, lo còrs de Jon Anza èra a la mòrga de l’Espital Purpan.
 
 
La polícia jamai examinèt pas l’identitat del pacient de l’Espital de Tolosa
 
Un autre fach que lo jornal considèra estonant es çò que se passèt al tribunal de Tolosa. Lo 4 de mai de 2009, los servicis juridics de l’espital demandèron a l’assistent del procuraire Renaud Soubelet qu’examinèsse l’identitat d’un pacient qu’èra estat trobat inconscient. Lo tribunal afirma que dos jorns puèi, s’envièt un fax al comissariat de Tolosa amb l’òrdre d’examinar l’identitat del pacient. Pasmens, curiosament, aquel òrdre apareis pas enluòc. Lo 12 de març de 2010, un còp identificat Jon Anza dins la mòrga, la polícia trobèt lo fax original dins lo tribunal.
 
Pendent totes aqueles meses, las demandas de l’espital recebèron totjorn la meteissa responsa: “La polícia examina”. Fin finala, se demostrèt que jamai s’èra pas demandat a la polícia d’examinar l’identitat del pacient. L’assistent del procuraire, Soubelet, foguèt desplaçat a Caièna, la capitala de la Guaiana francesa.
 
 
La polícia sabiá qu’èra membre d’ÈTA
 
Lo reportatge de Le Journal du Pays Basque remet en causa tanben que la polícia desconeguèsse l’apertenença d’Anza a ÈTA e, alavetz, qu’Anza èra pas susvelhat quand desapareguèt. Lo jornal remembra que la polícia aviá ja trobat las siás emprentas digitalas dins un amagatalh d’armas a Senpere (Bascoat) en 2008, e que lo sieu nom èra ja aparegut dins la documentacion confiscada a un autre militant d’ÈTA en 2003.