Deth 18 ath 20 de mai, vint gafets de 4u deth collegi Emile-Paul Vayssié d’Aurinhac que participèren a un viatge pedagogic en Lengadòc e en Provença, acompanhats peths sòns professors d’occitan, de latin e de sciéncias dera vita e dera tèrra.
 
Eth dimècres 18 de mai, eths collegians que’s triguèren a Nimes. Que i visitèren eth Musèu dera Romanitat, on participèren a ua activitat sus eth tèma deths gladiators. Eth ser, un còp arribats a Someire, qu’arrencontrèren Danís e Veronica, deth grop Coriandre. Aqueris dus intervenents que les proposèren un espectacle a basa de condes bilingües occitan/francés e de danças tradicionalas.
 
Eth endeman de maitins, eth grop que se n’anèc ath sud-èst de Camarga, ath domeni de La Palissada, entà descobrir eth dèlta de Ròse e era riquessa e era fragilitat de son patrimòni naturau, entram aiga doça e aiga salada. Après ua passejada comentada de duas oras e un arrepeishòt ath cance dera mar, que prengueren eth camin d’Arle, on visitèren eras Arenas e eth teatre antic, abans d’estudiar eth portau romanic dera basilica Sant Trefume e d’anar véder era plaça deth forum, on ei tanben quilhada ua estatua de Frederic Mistral.
 
Enfin, eth divendres 20 de mai, ua iniciacion ath jòc de bala ath tambornet que huc organizada a Montpelhièr, en partenariat dambe era Liga d’Occitània d’Espòrt Tambornet. Qu’ei dambe fòrça estrambòrd qu’eths collegians participèren ad aquera activitat, a tau punt qu’un projècte occitan-educacion fisica e esportiva qu’ei ath estudi entara annada escolara que venc.
 
Que cau tanben senhalar eth plan bon comportament deths collegians qu’arrepresentèren dignament eth sòn establiment pendent aqueris tres dias. Que les cau ara aprestar un libet de viatge, dambe comptes renduts deras visitas, impressions, illustracions objèctes personaus. Aqueris trebalhs que seràn presentats aths parents ara fin dera annada escolara.
 
 
 
 
Joan Pau Ferré