Lo candidat esquerrista Gustavo Petro es arribat largament en cap al primièr torn de l’eleccion presidenciala de Colómbia amb environ lo 40% dels vòtes, e ara passarà al segond torn contra lo populista Rodolfo Hernández, qu’a obtengut aperaquí lo 27%. L’estonament es doble: d’un latz perque se prevei la possibilitat que Colómbia aja lo primièr president d’esquèrra de son istòria, e de l’autre, perque Hernández, a pres la plaça del candidat de drecha, Federico Gutiérrez, qu’a obtengut mens del 24% dels vòtes.
 
Es lo tresen còp que Gustavo Petro se presenta a l’eleccion presidenciala de Colómbia, mas a la diferéncia de las anterioras, l’ex-cònsol màger de Bogotà es ara lo grand favorit per remplaçar Iván Duque al palais de Nariño. Se fin finala s’impausa al segond torn, Petro vendrà lo primièr president d’esquèrra de l’istòria de Colómbia. La popularitat del candidat e de son projècte politic se manifestèt sustot après las protèstas socialas d’arunan que revirèron la politica en Colómbia, en tot seguir lo vam de la revelhada sociala de Chile, de l’Eqüator e de Peró.
 
De soslinhar que son rival, Rodolfo Hernández, es un multimilionari que s’es erigit, gràcias a un discors clarament populista, en enemic de la burocracia e de l’excès de despensa publica, e en consequéncia li dison lo “Trump colombian”.