Actualitats
La Passem: comença uèi la corsa per la transmission de la lenga
Sent Martin de Senhans dona uèi lo senhal de depart per una corsa de 600 km qu’arribarà dimenge a Pau, en traversant las Lanas, lo Bas Ador, Bigòrra e Bearn
Tèxte legit
Comença l’edicion 2022 de la corsa per la lenga occitana La Passem, un eveniment màger per la transmission de la lenga que pòrta la mobilizacion generala dins totas las vilas e vilatges que travèrsa, plens d’animacions. La corsa partís uèi de Sent Martin de Senhans e percorrerà 600 quilometres per arribar dimenge a Pau, en traversant las Lanas, lo Bas Ador, Bigòrra e Bearn. L’eveniment es organizat per l’associacion Ligams.
La corsa partís a 14h de Sent Martin de Senhans, après una seguida d'animacions. A 10h i a d’obradors d'animacion pels escolans, a 11h30 los elegits e los organizaires prenon la paraula, a 12h se ten un dinnar sus plaça gràcias a una petita restauracion prepausada per l'associacion de parents d'escolans de la filièra bilingüa al profièch de La Passem. A 13h se distribuís los dorsals, e puèi los escolans legiràn lo messatge de La Passem, se cantarà lo Cant de la Passem e partirà la corsa.
La corsa passa uèi per Urt, Bidaishe e Sauvatèrra. Deman passarà per Ortès, Saut de Navalhas, Haget, Gèuna, Garlin, l’Enveja e Tarba. Dissabte passarà per Pontac, Nai, Laruntz, Arudi, la Seuva, Auloron e Monenh. Enfin, dimenge, arribarà a Pau en tot aver traversat Maseròlas e Morlans. Lo passatge de la corsa pòrta la mobilizacion generala dins totas las vilas e vilatges que travèrsa, plens d’animacions per far prene consciéncia de la transmission de la lenga.
La primièra edicion de La Passem se passèt amb grand succès en Bearn en 2018 e arribèt d’amassar 48 000 èuros que financèron uèch projèctes per la lenga occitana.
En 2020, èra previst que la corsa percorreguèsse Bearn, las Lanas e Bigòrra e mai tanben contunhèsse en Roergue, mas, a causa de la covid-19, se faguèt una version “confinada” mas amb una creativitat tala que, malgrat la separacion fisica, se capitèt a far de ligams dins lo Mond entièr.
Podètz seguir tota la corsa sus Ràdio País.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#9 Deishar de hantasmar, meilèu?
#9 Qu'èi paur que sias mau assabentat, gojat....Henriette Walter o Philippe Blanchet que son lingüistas qui deverés léger benlèu....bon lectura!
#4 Quiò, mei anar mei lingüsitas deu sistem solar qu'ac disen: n'i a pas ua mès DE lengaS gasconaS: la lenga bearnesa n'a pas arren a véder dab la lenga medoquina o la lenga lomanhòla. Be cau deishar de fantasmar dab l'unica lenga gascona ! Las conjugasons be càmbian d'un endret a un aute ! Que poderem devisar tanben de las prononciacions hèra diherentas d'un parçan a un aute deus país gascons.
#6
Per organisar una manifestacion coma aquela, cal una còla de benevòls que se'n dònan ....
(lor tiri lo berret !! )
E se ne volèm una dins nòstre ròdol.......se cal rebussar las margas, ...fargar una brava còla per l'organisar...
Òsca ! Que capite LA PASSEM !
Un exemple per Occitània tota...Quin que siá lo parlar !
Que siagan los Gascons Biarnéses que tiren en davant, tan melhor !
E coma dins una corsa, los que son primièrs ajudan sovent los que vòlon seguir a far d'esfòrces...
Es çò que podèm esperar.....
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari