Lo comic e cap del Movement Cinc Estelas, Beppe Grillo, a afirmat qu’es dispausat a acceptar un pache de govèrn amb Pier Luigi Bersani o amb Silvio Berlusconi en contrapartida d’una reforma de la lei electorala e de la limitacion de la permanéncia dels deputats al Congrès a sonque doas legislaturas.

“Se lo Partit Democratic de Bersani e lo Pòble de la Libertat de Berlusconi prepausan un cambiament immediat de la lei electorala, la cancelacion del remborsament de las despensas electoralas e la limitacion a doas legislaturas, sostendrem lo govèrn immediatament”, çò declarèt la dimenjada passada Grillo a la revista alemanda Focus. “Mas o faràn pas. Sonque fan dels desorientats per ganhar temps”, çò apondèt.
 
Grillo a insistit que la siá mission principala es de “liquidar lo vièlh sistèma, pas per plaser, mas perque es poirit”.
 
Lo comic a exigit lo cambiament de la lei electorala, que rend dificila la formacion d’un govèrn estable per manca de sistèmas de vòte diferenciats per cada cambra: Senat e Congrès. Pr’amor que las doas cambras an la meteissa importància, lo govèrn deu contrarotlar las doas per poder dirigir lo país amb comoditat.
 
Al delà, Grillo a reïterat que la siá intencion a l’ora d’ara es de forçar la convocacion de nòvas eleccions dins sièis meses, amb la volontat d’obténer una victòria generala. “Çò d’ara, es estat pas qu’un assag”, çò avertiguèt.