Alara que Thomas Pesquet s’imagina d’anar sus la Luna amb los americans, l’extraterrèstre Espelofit es a faire una virada en Lengadòc. A daissat sa planeta (non encara descobèrta pels astronòms) amb una mission particulara: la descobèrta dels païsatges d’Occitània. Es un trabalh que ne deu rendre compte a sos collègas d’escòla.
 
Per malastre, sa naveta s’encala, mas Magalí e Artús lo van ajudar. E nòstre Espelofit de descobrir Combalonga, la Boscarassa, la Fargueta e Fontcauda. Aurà una plan bona nòta en estipulant: ”En Occitània, la lenga explica bravament los païsatges!”
 
 
Lo projècte academic d’occitan de l’an
 
Son de milierats los escolans de l’acadèmia de Montpelhièr (e tanben del departament d’Avairon) a aver rescontrat Espelofit long de l’anada e a l’aver acompanhat dins sas recèrcas toponimicas. E òc, aquò èra lo tèma del projècte pedagogic occitan e transdisciplinari d’aquesta annada escolara 2021-22 per las escòlas mairalas e primàrias.
 
 
Lo temps de las Encontradas
 
E en aqueste mes de junh, las Encontradas son de retorn. Aprèp una annada 2020 sens recampament e una annada 2021 que los artistas rodèron de vidèos, de milierats d’enfants participan als recampaments d’Alès (2 de junh), Mende (9 de junh), Miraval (4 de junh) e Campendut (16 de junh).
 
Una escasença de viure una jornada dins la lenga, en escotant l’istòria d’Espelofit mesa en scèna pel Teatre de las Originas, de seguir de contes (amb Miriam Baffie, Bobby lo Contaire, Ives Seguièr o Alan Roch), de dançar (amb Cabr’e Can o Sors les mains de tes Poches dins Gard; lo Melsat, Castanha e Vinovèl o Camille en Bal a Mende e Miraval; aquelas doas darrièras formacions seràn tornarmai de la partida a Campendut ont s’i ajustaràn los Goulamas’K e los Romegaires), de cantar (amb Humpty Dumpty a Mende, Miraval e Campendut o amb lo parelh Abdel-Jocelin a Campendut tanben), de prene part a d’ajustas lingüisticas, de vesitas o de talhièrs de toponimia…

Lo tot es bailejat de man de mèstras e amb plan de vam per la còla de las quatre conselhièras pedagogicas d’occitan (Fabiana Albèrt, Jaumelina Martin, Joèla Rossinhòl e Celina Serva). Son ja a trabalhar a la redaccion del libret del projècte venent e a la compilacion de las cançons de mandar a las classas participantas mercé a las ajudas de la region. Se ditz que serián en cèrca d’un gran de milh…
 
 
 
 
Alan Roch




 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…