Los escolans de l’Escarea rapòrtan lor descobèrta del patrimòni de la vila en occitan vivaroalpenc dels Palhons e en francés regional francitan.

Dins l’encastre d’un projècte escòra-collègi emb doai classai de l’escòra escareasca de nivèls CE2-CM1 e CM1-CM2 de Dòna Veran e de Dòna Gambino organizeriam una sortia dins l’Escarea lo dijòus 12 de mai de 14h a 16h15. Lo tèma èra lo patrimòni regional en general e la toponimia coma la patronimia d’aquesta comuna palhonenca en particular.
 
Li collegians de M. Revèst avian ja adobat lo talh emb un estudi sus la toponimia de cada quartier e carriera principala de lai comunai de la valaia dal Palhon de Pelha (Luceram, Lo Toet de Braus, l’Escarea, Berra, Pelha, Blausasc e Pelhon). Seguit d’un estudi exaustiu sus tots li nomes de vias de la vila e dals escarts (Li Camps, La Valaia toscanofrancizat en Vallaja, etc.).
 
La partença èra l’escòra sonaia St Exupery, minga rapòrt de l’autor o de la familha emb la comuna ni lo sector, mas sèm acostumats (lo collègi se sòna Rabelais).
 
Passatge per “Lo Camin dai Pelandrons”. L’ocasion de se n’avisar per los escorans que passan davansh cada jorn e sabion ren ce que volia dire. Camin es un mòt semblant a d’autrai lengai latinai, mas lo rèsta? Pelandrons (l’-s se ditz a l’Escarea mas l’an obliat sus lo panèl), es lo nom de mainaias un pauc bolegonai. O de faiòls de gust fin tanben, anatz saupre perqué! Mas semblava pauc probable de parlar d’òrt per una escòra. A mai sigue luec de cultura.
 
 
Descubèrtai
 
Veire de panèls dar departament que senhalan de nomes de luecs per indicar lai dralhai e sendiers. Recurréncia remarcaia dai Prats, prononciat [pras] dar tèrme de baissa mai utilizat que còl o pòrt.
 
Justament sus l’avengüa Peirani (erudit e autor escareasc) l’ocasion de parlar de la variacion tipica dals patronims, li Peirani, lo paire Peiran, la maire Peirana, e per los enfants, lo peiranon e la peiraneta. Fa pensar al quartier de Pèira Cava a Luceram, s’es poscut far remarcar. E de variacions coma lo nom de la mestressa, Da. Veran! Coma Barelli e Barèl.
 
Ar passatge, an poscut relevar sus lo monument ai mòrtes quarques noms de familha tipiques dar país, qu’existon encara coma Faraut, Fulcònis, Malaussena, Massiera, Barel, Arnulf, Veran, Verani, Peirani...
 
Parier per l’escritura coma Barraia, que lo derivat Barraion existe coma estranom. Parier per Pelhon rapòrt ar vilatge de Pelha.
 
E coma nom de luec, a Caboalh, existe Barraia. Nom que pòr èstre escrich a la toscana Barraja, o la francesa Barraya parier.
 
La caminaia continua sus lo pònt nòu, de l’Armaia dals Alps, per se n’avisar que sèm verament dins la part alpenca dar departament dals Alps Maritimes. E de l’importància de l’Escarea coma luec de passatge simbolizat per li pònts. De camins automobiles coma de camin de fèrre.
 
Pi lo grop d’un quarantenal de pichons pilhèt direccion dar defici foncionant a l’energia de l’aiga, per un beal que ven dar Riu de Braus (francizat en Redebraus). Sonat coma lo vilatge de Braus que laissèt plus de traça ar còl dar mesme nom que mena a Suspèr.
 
Après aver rejonch la carriera St Sebastian per la bealiera, avèm poscut veire de faciaiai pintaiai de comèrcis ancians (capelaria, vèndita de lana, comestible...). De cartai postalai ancianai reproduchai sus de lausai mòstran que 100 ans fa, èran dubèrts.
 








 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…