Diuendres que ven, 17 de junh, era Val d’Aran commemorarà era sua Hèsta Nacionau, en rebrembe dera arrecuperacion des sues institucions. Enguan, eth govèrn deth Conselh Generau d’Aran propòse ua seguida d’eveniments pendent tota era setmana. Es eveniments que culminaràn diuendres damb era tradicionau recepcion des autoritats ena sedença deth Conselh Generau peth maitin, era desfilada de pendons e er acte institucionau enes roïnes deth Santuari de Mijaran. Encara de ser ei previst un espectacle tàs familhes, ua exibicion dera Associacion de Quilhes de Tredòs e un concèrt deth grop de musica cubana SongAran.
 
Autanplan, eth Musèu dera Val d’Aran aufrirà jornades de pòrtes dubèrtes deth dimars 14 enquia dimenge 19 de junh en orari de 10 a 13h30 e de 17 a 18 ores (e en orari de maitin sonque eth dimenge), e er Archiu Generau d’Aran aufrirà visites guidades ara Casa deth Senhor d’Arròs e eth Petit Musèu dera Escòla d’Arròs.
 
 
Drapèus enes balcons
 
Enguan eth govèrn aranés encoratge as ciutadans a penjar drapèus enes balcons en encastre dera Hèsta d’Aran. En aguest sens, repartís drapèus qu’es ciutadans pòden arremassar, deth 10 ath 16 de junh en Salardú, Vielha, Bossòst o Les.
 
 
31 ans d’autogovèrn
 
Era data deth 17 de junh que mèrque era restauracion deth Conselh Generau, qu’ei eth mès naut organ de govèrn aranés e, ath madeish temps, era principau administracion autonòma de tota Occitània. Justament per açò, era accion e era politica deth govèrn aranés son un exemple e un referent entà toti es occitans, que ven coma ua part deth sòn país ei estat capabla d’arribar a un govèrn autonòm damb tota era sua dignitat, en tot perméter era arrecuperacion dera lengua e dera cultura.
 
Era Val d’Aran qu’auec es sues institucions pròpries enquia 1834 quan sigueren suprimides pera reina espanhòla Isabèu II, qu’empleguèc era fòrça entà dissòlver es organismes tradicionaus aranesi. Un sègle mès tard, pendent era Dusau Republica Espanhòla, se sagèc de tornar as aranesi eth sòn govèrn autonòm tradicionau, mès era revòlta fascista deth generau Francisco Franco e era dictatura posteriora ac empedic. Calec demorar enquia 1991, quan eth govèrn catalanista dera Generalitat de Catalonha, pressionat peth movement ciutadan aranés des Terçons, restaurèc eth Conselh Generau e ne convoquèc es prumères eleccions entà tornar as aranesi eth sòn regim d’autogovèrn.
 
 

Hèsta d’Aran 2022
Eth Conselh Generau d’Aran celebrarà era hèsta damb diuèrsi actes ath long dera setmana que ven.
El Consell celebrarà la festa amb diversos actes al llarg de la setmana que ve.
El Consell celebrará la fiesta con actos a lo largo de la semana que viene. pic.twitter.com/hnk9STBvUX

— Val d'Aran (@Val_dAran) June 6, 2022