Los movements nacionals de l’estat francés an melhorat lo resultat de 2017. Los candidats sobeiranistas, que lo Ministèri de l’Interior francés sona “regionalistas”, son passats de 137 490 vòtes al primièr torn de 2017 a 291 392 (l’1,28%) ongan, çò es dos còps mai. A las legislativas de fa 5 ans, foguèron elegits 5 deputats diches “regionalistas”, tres còrses e dos martiniqueses. Ongan tot fa preveire qu’aumentaràn lor representacion dins l’Assemblada Nacionala francesa.
 
En Euròpa, la federacion Regions e Pòbles Solidaris, qu’amassa los partits sobeiranistas e autonomistas, a obtengut 146 066 vòtes (+15%), e los candidats qu’an despassat l’1% dels vòtes son passats de 55 a 64; çò que permet a la federacion de manténer e de melhorar las subvencions publicas que recep. Sa lista occitanista Endavant s’es presentada, amb 32 candidats, sus tot lo territòri occitan, amb una etiqueta “Òc per Provença” dins aquela region occitana.
 
 
Corsega
 
Los melhors resultats son en Corsega, ont quatre candidats sobeiranistas passaràn al segond torn. Fa 5 ans obtenguèron tres sètis suls quatre en jòc, mas manquèt al candidat de la primièra circonscripcion de Corsega del Sud sonque 13 vòtes per poder anar al segond torn. Ongan si que los nacionalistas còrses i seràn representats. D’efièch, Romain Colonna, amb lo 17,5% dels vòtes, afrontarà lo poderós Laurent Marcangeli, passat dels Republicans al macronisme, cònsol màger d’Aiacciu e cap de lista de la drecha a las eleccions territorialas de 2021, que n’a atench lo 33,7%. Malgrat la granda diferéncia, lo resultat es malsegur, perque una part importanta dels votants de l’independentista Jean-Paul Carrolaggi (12,69%) votaràn ara Colonna.
 
Dins los autres tres districtes, son estats los mai votats, malgrat la trencadura de la coalicion Per Corsega entre la lista Fagam Corsega, majoritària e autonomista, e la dels independentistas de Corsega Liura. Tanben los autonomistas se son devesits a l’Assemblada de Corsega entre los partisans del president de Corsega Gilles Simeoni (Fagam Corsega) e lo Partit de la Nacion Còrsa de Jean-Christophe Angelini, ideologicament mai a esquèrra; pasmens, las doas formacions autonomistas se son pas concurrenciats dins las circonscripcions. Dins lo segond districte de Corsega del Sud, Paul-André Colombani (Partit de la Nacion Còrsa) a melhorat lo resultat. Fa 5 ans foguèt segond en la primièra votacion, amb lo 29,10% dels vòtes, contra lo 36% dels Republicans, mas finiguèt que ganhèt lo segond torn amb lo 55% dels vòtes. Ongan, lo sosten a cambiat e a ja recebut lo 37,2% dels sufragis al primièr torn, fàcia al 27,6% del candidat de la drecha francesa.
 
Dins la primièra circonscripcion de Nauta Corsega, Michel Castellani (Fagam Corsega) s’es tanben refortit al primièr torn, amb lo 33,8% dels vòtes (+3,4), contra lo 13,6% del centrista independent Julien Morganti que serà son adversari al segond torn. Tot fa preveire que Castellani serà reelegit. Delà la diferéncia que i a entre los dos candidats, cal remembrar que fa 5 ans ganhèt aisidament lo segond torn, amb lo 61% dels vòtes, e que i a lo 7,38% dels votaires qu’al primièr torn an votat pels independentistas e qu’ara fòrça d’eles votaràn per l’autonomista.
 
Fin finala, dins la segonda circonscripcion de Nauta Corsega, Jean-Félix Acquaviva (Fagam Corsega) es estat lo primièr amb lo 33,5% dels vòtes, contra lo 29,06% del candidat independent de la drecha francesa François-Xavier Ceccoli. E mai siá una davalada a respècte de fa 5 ans, ont atenguèt lo 36,44% dels sufragis, cal prene en compte que lo candidat independentista, Lionel Mortini, es estat lo tresen mai votat, amb lo 18% dels sufragis. Es l’independentista còrs qu’a obtengut mai de sostens.
 
Lo nacionalisme còrs, qu’atenguèt la majoritat absoluda dins las eleccions territorialas d’arunan e que govèrn l’illa, sembla que pòt tornar plan capitar coma en 2017 o quitament obténer totes los sètis en jòc.
 
 
Paul Molac es totjorn lo mai votat dins sa circonscripcion
 
Un autre candidat dich “regionalista” en Euròpa que serà al segond torn es lo breton Paul Molac. Fa 5 ans se presentèt pel partit de Macron mas ongan es candidat amb Regions e Pòbles Solidaris. Malgrat son destacament de la majoritat presidenciala, s’es mantengut coma lo candidat mai votat, amb lo 37,7% dels sufragis; son rival serà lo nòu candidat macronista, que n’a atench lo 18,3%.
 
 
Los movements nacionals despassan las expectativas fòra d’Euròpa
 
Fa 5 ans foguèron elegits dos deputats d’otramar diches “regionalistas”. Ongan n’i aurà plan mai; almens 3 son ja garentits e es possible que sián quitament 8.
 
En Martinica, ont a las eleccions precedentas foguèt elegit un deputat independentista, trobam ara que dins doas circonscripcions los dos candidats que s’afrontan al segond torn son los dos independentistas. Per tant, dins aquela illa de la mar Cariba son ja garentits dos sobeiranistas.
 
Dins la segonda circonscripcion, l’independentista d’esquèrra Marcellin Nadeau (27,6%) afronta un autre independentista d’esquèrra, Justin Pamphile (25,84%), que fa 5 ans s’èra presentat amb Macron. Aquò se passa tanben dins la quatrena, amb un duèl entre lo deputat sortent, Jean-Philippe Nilor, qu’a atench lo 44% dels vòtes, e un autre independentista d’esquèrra, Alfred Marie-Jeanne (25,8%).
 
Dins los autres dos districtes i a tanben de candidats independentistas. Dins lo primièr, Philippe Edmond-Mariette es estat lo mai de votat, amb lo 17,9% dels vòtes, e afrontarà un candidat independent d’esquèrra, Jiovanny William, que n’a obtengut lo 14,6%.
 
Enfin, dins la tresena circonscripcion, Francis Carole, del Partit per la Liberacion de Martinica, independentista d’extrèma esquèrra, es passat al segond torn amb lo 19% dels vòtes e assajarà de venir deputat contra lo candidat autonomista d’esquèrra Johnny Hajjar, qu’a atench lo 37% dels vòtes al primièr torn.
 
En Guaiana, dins la primièra circonscripcion trobam tanben que los dos candidats qu’an accedit al segond torn son de “regionalistas”, e fa 5 ans n’i aguèt pas cap. Yvane Goua (20,77%) d’un movement contra la violéncia e que promòu un nòu estatut, es arribada primièra, e Jean-Victor Castor, del Movement de Descolonizacion e d’Emancipacion Sociala, serà son rival après aver accedit a la votacion de dimenge amb lo 17,3% dels vòtes.
 
Dins la Polinesia Francesa, Moetai Brotherson, deputat sortent, torna èsser lo mai votat dins sa circonscripcion, amb lo 34,26% vòtes, e afrontarà lo candidat macronista, que n’a obtengut lo 32,04%. Fa 5 ans, lo resultat foguèt semblable, e Brotherson s’impausèt per una majoritat estrecha, amb lo 52,2% dels sufragis.
 
An tanben la possibilitat d’obténer un deputat los independentistas de la Nòva Caledònia, en seguida d’un acòrdi dels tres principals partits per se presentar ensems. Al segond torn, dins las doas circonscripcions afrontaràn los macronistas. Dins la primièra, Walisaune Wahetra a obtengut lo 21,7% dels vòtes, e lo macronista Philippe Dunoyer lo 40,8%; e dins la segonda, Gérard Reignier es estat segond, amb lo 32,77% dels sufragis, mentre que lo candidat macronista, Nicolas Metzdorf, èra lo mai votat just just, amb lo 33,7%.