La Cort Europèa dels Dreches Umans (CÈDU) a ordenat d’arrestar lo fòrabandiment devèrs Rwanda d’un ciutadan iraquian qu’aviá demandat l’asil al Reialme Unit. L’òrdre es arribat qualques oras abans la partença del primièr vòl que transpòrta de migrants e refugiats devèrs lo país african. La decision s’es prononciat après la menaça del primièr ministre britanic, Boris Johnson, de retirar lo Reialme Unit de l'Acòrdi Europèu dels Dreches Umans.
 
“Lo tribunal a pres en compte los chepics senhalats pel Naut Comissariat de las Nacions Unidas pels Refugiats (NACNUR), sul fach que los demandaires d’asil transferits del Reialme Unit a Rwanda auràn pas accès a las proceduras per la determinacion de l’estatut de refugiat”, çò a detalhat dins un comunicat.
 
Mas sustot, segon los jutges de la CÈDU, se pòt pas expulsar un òme abans tres setmanas après que se pronóncia la decision finala, çò qu’es pas lo cas: l’òme quitèt Iraq en abril passat e sollicitèt l'asil tanlèu arribat al Reialme Unit lo 17 de mai. Qualques setmanas pus tard, l’administracion britanica li respondèt que sa demanda d’asil èra inadmissibla e que seriá mandat en Rwanda.
 
Lo Reialme Unit a signat un acòrdi amb Rwanda segon lo qual pòt fòrabandir devèrs lo país african los demandaires d’asil que travèrsan la Marga. L’acòrdi es dotat de 144 milions d’èuros e se centrarà sustot suls òmes sens responsabilitat familiala.