“Sextina en país d’Òc”, tal es lo titol d’una accion conjunta menada per l’Universitat Joan Jaurés (Tolosa; a l’iniciativa de Joan-Francés Marcèl, professor en estudis sul comportament, lo lengatge, l’educacion e la socializacion ) e l’Institut d’Estudis Occitans d’Aude. Sièis cercaires e sièis poètas occitans van debatre entre eles pendent tres jorns del contengut e de las tematicas de la poesia occitana contemporanèa a l’entorn dels mots : Cosmogonia – Desir – Lengatge – Mesura – Praxis – Transmission.
 
Participaràn als trabalhs, del costat dels escriveires: Paulina Kamakina, Eliana Pinhòl, Miquèla Stenta, Eric Fraj, Alan Roch e Gerard Zuchetto (amb una pensada per Miquèl Decòr que prenguèt part a l’elaboracion de l’operacion), e tanben Lisa Gròs (Tè Vé Òc) e lo plastician Didièr Mir.
 
Aqueste rescontre se tendrà d’aqueste dimars 21 al dijòus 23 de junh a Carcassona. A la debuta de 2023, pareisserà un obratge amb de poèmas, d’analisis e compte rendut de las discussions.
 
En mai d’aqueste temps de trabalh, dos rendètz-vos son dobèrts al public.
 
 
AArgon, Éric Fraj cantalos poètas
 
A Argon, a l’Ostal de Cabardés, amb lo concors de Fasètz la Lenga en Cabardés, la Fèsta de la Musica d’aqueste dimars 21 de junh prendrà la forma d’un recital del grop vocal Cossí que siague (19h), d’un sopar convivial (a 20h, 15 èuros, se marcar: +33(0)6 14 39 16 39) e d’un recital d’Eric Fraj (a 21h30) ont lo cantador occitan interpretarà amb son vam costumièr los poètas d’òc, mas tanben franceses, catalans o castelhans qu’admira.
 
 
Rendètz-vos poetic aViladubèrt
 
L’endeman, dimècres 22 de junh, al Fogal de Viladubèrt (21h), en ligason amb la calandreta La Rosèla, se tendrà un moment de lectura ont los poètas diràn, declamaràn o legiràn de tèxtes que los an marcats e/o qualques unas de lors creacions per un temps de paraula, d’escambi e d’escota que mostrarà que la poesia es un art intemporal e doncas actual per dire, comprene o subvertir la vida e lo mond.
 
 
Omenatges a Miquèl Decòr
 
Lo sovenir de Miquèl Decòr, desparegut en mai de 2021, es marcat per la publicacion del libre d’omenatges Decòr, de còr per Tròba-Vox e l’IEO Aude. Sas darrièras òbras seràn evocadas aqueste divendres 17 al rendètz-vos «E… rau» al CIRDÒC (18h30) e tanben a la Mediatèca de Narbona, lo jorn de Sant Joan: divendres 24 de junh a 14h30. Una placa de remembrança serà pausada sus una plaça de Bisan de Menerbés dimenge 26 de junh en fin de matinada dins l’encastre del Total Festum de la calandreta Lo Cigal. L’òbra de poèta e de novelista de Miquèl Decòr serà tanben lo tèma del cabaret literari de l’Universitat Occitana de Nimes lo diluns 11 de julh. Los poèmas e las paraulas dels poètas an vocacion de contunhar de córrer coma un taisson dins la nuèit…
 
 
 
 
Alan Roch