Diluns passat, un òme abilhat de Batman portèt al comissariat de la vila de Bradford, en Anglatèrra, un presumit delinquent qu’èra cercat per fraudariá e manipulacion d’objèctes raubats. Lo desguisament que vestissiá èra lo del personatge de la sèria de television dels ans 1960, non pas aquel dels darrièrs filmes de Cristopher Nolan. Aquel eròi, tanben, mostrava un pauc de ventre.
 
“En Batman, venguèt cap al taulièr e diguèt al personal: «L’ai portat per vosautres». Se n’anèt sul pic”, çò expliquèt la polícia del comtat de Yorkshire Oèst sus Facebook.
 
Las camèras de seguretat enregistrèron d’imatges de l’òme abilhat de Batman. Mas, segon la polícia, demòra dins l’anonimat.
 
Aquel eveniment a fach que circulen tota sòrta d’especulacions a prepaus de l’identitat d’aquela persona.
 
I a agut d’especulacions que l’arrestat poiriá conéisser aquel crosat mascat, mas la polícia de Yorkshire Oèst a afortit que sabiá pas la siá identitat e que podiá pas dire se se tractava d’un amic de l’òme arrestat.
 
Sus Twitter comencèt de circular la rumor que s’agissiá de George Galloway, un popular e polemic deputat del parlament per Bradford. Mas Galloway a mes en evidéncia sul sieu Twitter qu’es pas el: “Contràriament a las rumors que circulan per Gotham, soi pas lo Batman de Bradford. Ça que la, lèvi lo capèl per el e li desiri astre dins l’avenir”.
 
Sembla que i a solament una persona que sap qual es e cossí s’apèla. Kathryn Sutcliffe, de la botiga de desguissaments The Joke Shop de Kirkgate Market, expliquèt a la BBC qu’ela vendèt lo vestit de Batman, dos jorns abans l’eveniment, a un òme d’entre vint e trenta ans. “Normalament lo mond vòlon lo vestit de The Dark Night (lo personatge de Batman dels filmes de Nolan), mas el volguèt aquel autre”, çò diguèt Sutcliffe, qu’apondèt que l’individú parlava “amb l’accent local” e aviá lo pel negre e frisat. L’òme paguèt amb carta de crèdit, e donc la vendeira a lo sieu nom, mas a assegurat que lo mantendrà en secret. 


Li dison Stan Worby e es un amic de l’arrestat
 
L’eròi revelèt la siá identitat dimars passat al jornal The Daily Telegraph: li dison Stan Worby, a 39 ans e trabalha coma liuraire dins un establiment de manjar chinés.
 
Worby expliquèt que l’individú que liurèt a la polícia es un amic sieu de 27 ans que s’apèla Danny Fraynem, que sabiá que lo cercavan e que se voliá liurar a la polícia. “Lo mieu amic Danny me telefonèt e me demandèt que l’acompanhèsse al comissariat”, çò diguèt. “Aguèri l’idèa de me metre lo desguisament de Batman. Lo primièr policièr riguèt e nos prenguèt pas seriosament. Ieu contunhèri la badinada e li diguèri que me meritavi una medalha per la miá gèsta”.
 
Lo Batman de Bradford compareguèt ièr divendres, abilhat de civil en acompanhant l’arrestat, a l’enquista judiciària que se debanèt.