De milièrs de refugiats del pòble rohingya an menat a bon tèrme una marcha pacifica dins lo grand campament de Cox’s Bazar, lo refugi ont arribèron fa cinc ans en fugissent  las atrocitats de la persecucion de l’armada birmana.
 
La marcha comencèt dimenge, un jorn abans la commemoracion del Jorn Mondial dels Refugiats e jol lèma “Rintrem a l'ostal”. Los participants distribuiguèron de tractes qu’explicavan lors sèt demandas sus lor retorn en Birmania, dont de garentidas de seguretat e l’anullacion de la lei birmana del ciutadanatge  de 1982, que los reconeis pas coma ciutadans.
 
“Lo diluns 20 de junh es lo Jorn Mondial del Refugiat. La velha,dins gaireben totes los campaments rohingyas a Ukhiae Teknaf, volèm assabentar lo Mond,a travèrs de mitings pacifics, que los rohingyas sèm de ciutadans de Birmania e que l’estat d’Arakan es nòstre luòc de naissença. Volèm rintrar dins nòstra pàtria”, çò declarèt  un dels organizaires, Zahid Hossain, al  jornal  bangladèshi  Daily Star.
 
“Los rohingyas vòlon tornar dins lor tèrra natala”, çò a dich Shamsud  Douza, lo Comissari  Adjonch de la Repatriacion e de l'Ajuda als Refugiats, que sosten la marcha.
 
 
La minoritat mai secutada del Mond
 
Los rohingyas son una minoritat etnica de fe musulmana que se concentra dins l’estat birman de Rajine (o Arakan, coma li dison los rohingyas). Birmania los considèra coma de descendents d’immigrants illegals sortits de Bangladèsh e los reconeis pas coma ciutadans, en los privant de dreches fondamentals.
 
Uèi per uèi, gaireben un milion de refugiats rohingyas demòran dins de campaments subrepoblats en Bangladèsh sens possibilitat de retorn en cò lor, un país qu’es ara jos una dictatura militara. A mai, las autoritats de Bangladèsh los vòlon remandar sus l’illa de Bhasan Char, una illa acantonada del dèlta de Ganges, fins ara desabitada, que s’inonda fòrça sovent, sustot pendent la sason de las pluèjas.
 
Amnestia Internacionala considèra los rohingyas coma la minoritat mai secutada del Mond.