Lo ministre dels afars estrangièrs italian, Luigi di Maio, a anonciat sa partença del Movement 5 Estelas (M5S) en tot provocar una granda scission al parlament italian. Lo refús del cap de la formacion, Giuseppe Conte, de mandar d’armas a Ucraïna es la rason que l’a invocada Di Maio per quitar lo partit. Conte s’opausa al primièr ministre, Mario Draghi, pel sosten a l’ajuda militara a Ucraïna, del temps que Di Maio es d’acòrdi amb Draghi.
 
“Es una causida dolorosa, qu’imaginèri pas jamai que caldriá far”, çò anoncièt dins una conferéncia de premsa. Dins son discors de partença, Di Maio assolidèt que fàcia a una situacion talament complèxa caliá “una Euròpa unida”. Quant a la guèrra d’Ucraïna, diguèt qu’es “pas un espectacle mediatic, es reala, las victimas son realas”.
 
L’M5S es a l’ora d’ara la formacion que ten mai de deputats. Mas en consequéncia de la partença, los partisans de Di Maio se son desseparats dels de Conte, e ara amassan de signaturas per constituir un grop parlamentari pròpri. Lo nòu movement se dirà Amassa pel futur (Insieme per il futuro) e aurà aperaquí 60 deputats. Segon lo quite Di Maio, lo nòu projècte politic “aurà pas d’espaci per l’òdi ni lo populisme”.