La Comission Europèa a exigit que l’Estat francés responda d’aicí al 25 de març sul cas del benorrit, un ausèl migrator tanben nomenat ortolan. Es caçat en contravencion dins las Lanas de Gasconha, dètz ans après lo sieu classament en espècia protegida.

“Lo 25 de genièr passat, la Comission Europèa mandèt una somacion de compliment a las autoritats francesas pr’amor que luchan pas contra lo braconatge e lo trafec fòrça lucratiu del benorrit (Emberiza hortulana)”, çò expliquèt a l’AFP Pierre Athanaze, president de l’Associacion per la Proteccion dels Animals Salvatges (ASPAS), qu’es a l’origina de la denóncia. “Per nosautres es una granda victòria. Avèm portadas totas las pròvas per denonciar un braconatge organizat e testimoniar que i a pas cap de lucha contra aquel braconatge”, çò apondèt.
 
Segon los defensors d’aquel petit passerat, dempuèi qualques ans, e “a la demanda de qualques elegits influents, una tolerància totalament illegala permet als braconaires lanusquets de capturar viu aquel migrator sul pic dins lo sieu long viatge, per lo consume”.
 
“Abans d’acabar dins la sièta, l’ausèl es agantat, engraissat pendent tres a quatre setmanas, dins lo negre complet, puèi negat dins un veire d’armanhac abans d’èsser vendut aperaquí 100 èuros la pèça a de restauraires”, çò afirmèt Athanaze, que remembrèt que “França ja l’avián condemnada en 1998 per la non-proteccion del benorrit, e un autre còp en 1999 amb una  multa de 142 425 èuros per jorn per marrida fe confirmada”.
 
Del sieu costat, la Liga de Proteccion dels Ausèls, que menèt lo 8 de setembre passat una accion dins las Lanas contra los braconaires qu’estendon de matòlas, estima que 30 000 d’aqueles ausèls son capturats cada sason.