Atac terrorista omofòb a Òslo (Norvègia). Doas personas mòrtas e 21 nafradas es lo tragic bilanç d’una fusilhada a l’exterior d’un bar LGBT, dins un restaurant de manjar rapid e dins un club de jazz. Los tres sits son dins la carrièra de Rosenkrantz, al centre de la capitala norvegiana. Sul pic la polícia detenguèt un òme e dobriguèt una enquista antiterrorista. Lo crime es restacat a la marcha de las fiertats LGBT, que se suspendèt.
 
Lo bar LGTBI, apelat London Pub, es una de las tres scènas del crime. I a agut tanben de personas nafradas dins un restaurant de manjar rapid e dins lo club de jazz Herr Nilsen. La marcha de la fiertat LGTB, que se deviá far dissabte de ser, foguèt suspenduda per la polícia.
 
La ministra de la justícia e de la seguretat publica de Norvègia, Emilie Enger Mehl, a plangut lo dòl de las familhas dels mòrts e dels nafrats. “Norvègia es una comunautat de fisança ont totes nos deuriam sentir segurs”, çò diguèt, abans d’assegurar que las fòrças policièras trabalhavan per esclarzir los faches.