La primièra ministra escocesa, Nicola Sturgeon, a anonciat al parlament escocés la data del segond referendum d’independéncia e lo camin legal que vòl seguir per lo poder menar a bon tèrme. “Es ara ora, en aqueste moment critic de l’istòria, de debatre e decidir lo futur de nòstre país”, çò a dich. La procedura es la seguenta: lo parlament escocés deu aprovar un projècte de lei sus un referendum d’independéncia per tal que se faga un vòte consultatiu lo 19 d’octòbre de 2023, amb la meteissa question qu’en 2014. Legalament, las institucions escocesas an la competéncia d'o far. Sturgeron a tanben anonciat que l’oficièr juridic escocés aviá remés lo projècte a la Cort Suprèma, per evitar qu’una possibla oposicion del govèrn britanic bloquèsse lo projècte de lei quand seriá aprovat e que i aguèsse cap de sòrta de dobte o de retard.
 
Dins aquel encastre, la cap escocesa a publicat una letra adreiçada a Boris Johnson, primièr ministre britanic, que ditz que se los tribunals britanics anullan la lei, aquò voldrà dire que l’union entre Anglatèrra e Escòcia serà pas pus volontària. A mai, assegura tanben que, malgrat  qu’avance dins son plan de far un referendum consultatiu, es totjorn dobèrta a negociar lo transferiment de las competéncias per far un vòte constrenhent. Johnson a respondut publicament que çò que cal es tractar los problèmas qu’impòrtan a las gents. Johnson es totjorn contrari al referendum, mas sa còla a soslinhat qu’esperariá lo verdicte de la Cort s
Suprèma sus la legalitat del projècte de lei del govèrn escocés. “Tant nòstra prioritat coma la del govèrn escocés deuriá èsser de trabalhar ensems amb un apròchi implacable suls problèmas qu’impòrtan vertadièrament a las gents”, çò an dich de fonts de l’executiu britanic.
 
Lo cap dels conservators escoceses, Douglas Ross, a anonciat que son partit participariá pas a aquel segond referendum e a acusat l’SNP de priorizar l’independéncia sus las autras questions.