La Cort Penala Especiala de París a condemnat totes los acusats pels atemptats terroristas dels 13 e 14 de novembre de 2015 que causèron 130 mòrts e 352 nafrats, dont Salah Abdeslam, lo sol subrevivent del grop jihadista que perpetrèt materialament l’atac. Abdeslam foguèt ja condemnat per la justícia bèlga per una temptativa d’omicidi dins una fusilhada contra un policier que se produguèt a Brussèlas en març de 2016, quand s’amagava après los atemptats de París. Ara l’an condemnat a la perpetuitat irreductibla coma coautor d’assassinat e de temptativas d’assassinat e per apertenéncia a una organizacion terrorista.
 
An tanben condemnat a perpetuitat —totun, revisabla après 22 ans— Mohamed Abrini, considerat colpable dels delictes d’apertenéncia a una organizacion terrorista e de complicitat d’assassinat e de temptativas d’assassinat. A mai, son condemnats a 30 ans de preson Osama Krayem, Sofien Ayari e Mohammed Bakkali; Muhammad Usman e Adel Haddadi, a 18 ans; Yassine Atar —fraire d’Oussama Atar, considerat coma lo cervèl dels atemptats— e Mohammed Amriu, a 8 ans. Ali Oulkadi es condemnat a 5 ans de preson; Abdellah Chouaa e Hamza Attou a 4 ans e Farid Kharkhach a 2 ans.
 
La nuèch del 13 al 14 de novembre de 2015, l’orror s’installèt a París. Divèrses atacs terroristas causèron 130 mòrts. I a aguèt de fusilhadas simultanèas en divèrses endreches, mas lo chaple pus sanguinari se passèt dins la sala d’espectacle del Bataclan, ont se teniá un concèrt la banda Eagles of Death Metal davant environ 1500 personas. Delà las fusilhadas, i aguèt una granda explosion a l’exterior de l’estadi de França ont jogavan al fotbòl las esquipas de França e Alemanha en preséncia del president François Hollande.
 
Dels assalhidors subrevisquèt solament Salah Abdeslam, que fugiguèt en Belgica, ont foguèt detengut. Cinc dels agressors s’immolèron pendent los atacs, e autres dos foguèron abatuts per la polícia.