Los Dragons engrunan l’aureòla dels Sants
 
Mai de 10 000 espectators se remosèron a Brutus aqueste dissabte 2 de julhet, amb la preséncia d’un fòrt contingent de sostens angleses del campion, Saint Helens. En mai dels nafrats, quatre jogaires catalans poguèron pas prene part a la partida que se trapèron positius a la covid.
 
Los angleses escartan una palma e Mata’utia se trapa amb un baloard per marcar; l’alièr Makinson fa ten-tu, ten-ieu amb son arrièr e marca: 8-0 pels vesitaires. Lo pilar local Napa pren un jaune. Los angleses se fan refusar un ensag al vidèo alara que Laguerre punta la palma dins lo recantonet per dobrir lo planchòt catalan. Yaha recentra al pè, Drinkwater marca e Tomkins transforma: 10-8 pels catalans a la pausa.
 
Tre la represa, los Sants tornan prene l’avantatge. Drinkwater mes sur orbita per Whitley libèra la pauma per Langi que marca e Tomkins transforma. Passa sautada de Drinkwater, designat òme de la partida per Romano que remet a Whare. Los catalans menan 20-12. Pas lo temps de bufar que, a un contra un, Welsby pana la palma al pilar Kasiano e va entre los paissèls. Demòra dètz minutas a jogar, los catalans menan 20-18. Saint Helens traparà pas de solucion e los Sang e Aur tenon còp e la victòria a la mai granda jòia dels sostens que pican de las mans longament per saludar los venceires. Succès de confirmar per la Dimenjada Magica amb los Lops de Warrington coma opausants, dimenge de vèspre, sus la pelena de Newcastle.
 
 
La victòria de l’esper pel TO
 
Aqueste mes de julhet, los tolosans benefícian d’un calendièr un pauc particular amb 4 recepcions a Ernèst Wallon: Hull KR aqueste dissabte 2, Leeds lo dissabte 16, Salford lo dissabte 23 e Hull FC lo divendres 29 e, de mai, dissabte 9, son concurrent dirècte per evitar la davalada: Wakefield.
 
Davant 3500 espectators, lo TO marca un ensag e ajusta la transformacion e la penalitat per menar 8-0 a la pausa. Los angleses tornan determinats mas los occitans apondon una penalitat e un novèl ensag transformat per menar 16-0 a la 50a minuta. A l’ora de jòc, Tòni Gigòt i va d’una 40-20 bonificada per un novèl ensag. Se los angleses salvaràn l’onor, lo darrièr mot demorarà pels tolosans amb un quatren ensag que lor i permet de ganhar 28-6.
 
Divendres, Castleford aviá batut Huddersfield 26-18, alara que dissabte Leeds anava ganhar 62-16 cò d’Hull FC. Dimenge, autra bona novèla pel TO: la desfaita de Wakefield sus sa pelena fàcia a Wigan: 46-22 alara que Salford ganhava a Warrington 32-24.
 
En mai de Tolosa-Wakefield, que dobrirà la dimenjada, e de Catalans-Warrington, la Dimenjada Magica veirà dissabte las oposicions St Helens/Wigan e Leeds/Castleford; puèi dimenge: Huddersfield-Salford e lo dèrbi entre las 2 formacions d’Hull.
 
 
NRL: retorn a l’ostal pels NZ-Warriors
 
Aprèp doas annadas d’exili en Austràlia en rason de la situacion sanitària, aqueste dimenge, los NZ-Warriors tornavan trapar lor pelena d’Auckland. Mercé a tres ensages, batèron una pallinèla formacion dels Tigres: 22-2.
 
Dijòus, Manly menava 36-12 a cinc minutas del tèrme fàcia a Melbourne. Dins las darrièras 5 minutas, Melbourne tornava a 30-36.
 
Divendres, los Polets s’opausavan bravament a Penrith mas plegavan 26-18 e capitan pas de prene lo vagon dels primièrs 8. Dissabte, los Vaquièrs emportèron lo dèrbi de Queensland en mestrejant los Cavals fòls de Brisbane 40-26. Los Lapinons marcan 5 ensages e baton las Anguialas 30-12.
 
 
 
 
Alan Roch