capçalera campanha

Actualitats

Internacional

Caracalpaquistan: almens 18 manifestants mòrts dins de protèstas nombrosas

Ozbequistan vòl cambiar sa Constitucion e compta d’abolir l’autonomia de la Republica Caracalpaca e son drech d’independéncia

Tèxte legit

De milièrs de personas protèstan dempuèi divendres passat en Caracalpaquistan contra los plans d’Ozbequistan de retirar a aquela region administrativa ozbèca l’autonomia e lo drech de secession. Dimenge passat, la polícia empleguèt de tancs d’aiga tenchada contra los manifestants. Los vidèos e imatges publicats suls rets socials mòstran de canons a lançar d’aiga roja per dispersar los manifestants e los tacar, çò que permet lor identificacion pus tard. L’estat ozbèc reconeis almens la mòrt de 18 manifestants e 250 nafrats.
 
D’autre caire, lo parlament ozbèc a ratificat lo decret de declaracion de l’estat d’urgéncia emés dissabte pel president del país, Shavkat Mirziyoiev, en responsa a las protèstas. L’estat d’urgéncia compren un cobrifuòc entre 21h00 e 7h00, se restrench l’intrada e la sortida de la region e s'enebís totas las reünions publicas. A mai, se desplega de personal militar.
 
Las protèstas denóncian un projècte de cambiament constitucional que compta d’abolir l’autonomia de la Republica de Caracalpaquistan, que segon la Constitucion en vigor a quitament lo drech d’independéncia. Aquel cambiament provoquèt de fòrtas manifestacions divendres passat en de circonstàncias plan pauc abitualas dins un país autoritari coma Ozbequistan.
 
Dissabte, Mirziyoyev se gandiguèt a Nökis, la capitala caracalpaca. Pauc apuèi, un pòrtavotz presidencial diguèt als mèdias que se respectariá lo tèxt constitucional sus la sobeiranetat autonòma de la region, mas aquò calmèt pas brica las protèstas.
 
Per ne saber mai, podètz legir en catalan sus Nationalia: “Què és el Karakalpakistan i què hi està passant?”


 
 
 
 
 
 
 
 
 
abonar los amics de Jornalet
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris


I a pas cap de comentari

Escriu un comentari sus aqueste article