Aquesta dimenjada, Escalas (entre Corbièras e Menerbés) festejarà lo bicentenari de la naissença del felibre Aquiles Mir: “Poiriái viure cent ans e mai, que desbrembarai pas jamai lo vièlh amorièr dal vilatge.”. E mai se lo pichon Aquiles venguèsse al Mond lo 30 de novembre, la Comuna n’a profeitat per pausar las plancardas de dintrada en lenga nòstra.

Doas jornadas a Escalas
 
Aqueste dissabte 9, a 11 h del matin, rendètz-vos al pè de son ostal mairal (3, Carrièra… Aquiles Mir) per de discorses, de cants e la pausa d’una garba de flors. A miègjorn, sala… Aquiles Mir: aperitiu (i aurà probable d’Or-Kina Sabatièr que lo poèta vantèt) e repais ofèrt (faire seguir los cobèrts, o manjaretz amb los dets!). A 14h30, Joan Forièr (felibre e ancian president de l’IEO Aude) contarà pel menut la vida d’Aquiles Mir. A 16h30, lo grop vocal d’Esperasan, lo GESPPE, balharà un recital que mesclarà cants e poèmas.
 
Represa de las festivitats dimenge a 9 h del matin per una passejada de sèt quilomètres ont seràn presentats 12 punts remarcables del vilatge en ligam amb la vida e l’òbra del felibre. A miègjorn, los caminaires e los autres auràn dreit a l’aperitiu, abans la grasilhada e las patanas fregidas. A 14h30, la tropa de l’FRJEP de Fabresan contarà LoSermon del curat de Cucunhan. Cambiament de ritme sul còp de 19h30 amb lo concèrt (a gratis) dels Golamas’k. Aquí doncas un brave programa plan eclectic e plan dinamic !
 
 
Una votz de la tèrra d’òc
 
L’òbra de l’Aquiles Mir es plan rica. Se ne coneis mai que mai sos tèxtes comics coma Lo lutrin de Ladèrn o Lo Sermon del curat de Cucunhan, mas son òbra poetica es tanben abondosa, recampada en particular dins la rejunta La Cançon de la Lauseta.
 
Filh d’obrièr agricòla, dintrèt a l’Escòla Normala. Venguèt regent, inventèt un metòde d’escritura, se faguèt professor de calligrafia abans de venir en 1869 lo director comptable de la manufactura de draps de la Trivala.
 
Amb un sens bèl de las comparasons e dels mots justes, foguèt correspondent de Frederic Mistral per la redaccion del Tresaur dau Felibritge. Recampèt fòrça expressions de Carcassés e de Narbonés dins un glossari que Letras d’Òc e l’IEO Aude ne venon de publicar una edicion novèla.
 
A Carcassona, lo bust que li èra dedicat desapareguèt en 1944: seriá benlèu ora de tornar onorar la memòria d’aquel grand felibre.
 
 
 
 
Alan Roch