Se ven de presentar un nòu sit web amb una antologia de tèxtes en lenga occitana de totes los tempses seguida d’un diccionari. Lo sit, occitan.org, l’a fach Danís Capian amb la tòca de “permetre au mond de legir de tèxtes que son pas disponibles autrament, a mai d’aver a posita un diccionari e d’elements gramaticaus de prononciacion e de morfologia verbala per estudiar la lenga occitana”. Lo sit es gratuit e conten pas de publicitat.
 
“Quand aguèi acampat una matèria occitana pro importanta, me diguère que lo pauc que sabe ieu quò poiriá interessar d’autras personas que poiriu apiar pus facilament en editant sobre la tiala mondiala que non pas amb d’òbras de papier. E o tròbe practic mai de poire botar mai de contengut per abondar lo sit de temps en temps sens me pausar la question de quora botar un punt finau en d’una antologia o un diccionari”, çò precisa Capian a la redaccion de Jornalet. Quant al public objectiu, Capian nos ditz que  totes sos “fraires umans son susceptibles de s’interessar quauque còp en la lenga occitana e d’aver esvea d’eissaiar de la legir”.
 
Los tèxtes, Capian los presenta tal coma los trobèt acompanhats d’una transcripcion en grafia classica.