La Cort Europèa dels Dreches Umans (CEDU) considèra “desproporcionada” la pena de 18 meses de preson que la justícia francesa infliguèt a Jean-Marc Rouillan, militant d’extrèma esquèrra e fondador del grop armat autonòm Accion Dirècta. La cinquena seccion de la CÈDU conclutz que s’es violat l’article 10 de la Convencion Europèa dels Dreches Umans, e condemna l’estat francés a indemnizar Rouillan de 15 000 èuros pels meses d’encarceracion. La decision l’an presa a l’unanimitat sèt jutges sortits d’Irlanda, de Letònia, d’Ucraïna, de Mónegue, de Montenegro, de Norvègia e mai de França. Estiman que “l’ingeréncia dins la libertat d’expression que la constituís la pena de preson que li foguèt impausada èra pas necessària dins una societat democratica”, çò rapòrta Directa.
 
En aquesta ocasion, Rouillan èra estat condemnat per sas declaracions dins una emission de ràdio en 2016, del jornal satiric marselhés Le Ravi. Aquí, qualifiquèt los militants jihadistas de personas “coratjosas”, e mai dins la meteissa entrevista diguèsse qu’èran “salvatges” e “crusèls” per la terror indiscriminada que defendon.
 
Nascut a Aush en 1952, Rouillan a passat mai de 20 ans en càrcer, dont 11 dins de presons de nauta seguretat. En decembre de 2007 comencèt de beneficiar d’un regim de semilibertat, que li foguèt levat après una entrevista concedida al setmanièr L’Express. En mai de 2011 tornèt beneficiar del regim de semilibertat fins que l’embarrèsson 18 meses de mai per aquela entrevista de ràdio. Patís la malautiá d’Erdheim-Chester, que l’atribuís als ans passats en preson.