Per ara, excepcionalament, lo Marcelin Albèrt tornarà dobrir son cafè d’Argelièrs (Menerbés) que foguèt lo QG de la Revòlta dels Vinhairons en 1907. Un moment bèl per reconèisser lo ròtle istoric que joguèt per l’endevenidor de la vinha lengadociana aquel òme del destin extraordinari. Se ganhèt l’escais de Cigal per çò que montava suls arbres de las Barcas a Narbona los jorns de mercat per cridar a una accion fòrta per la defensa de la viticultura e del vin natural. Venguèt l’apòstol e lo cap de la revòlta, lo primadièr de tres meses del movement qu’embrandèt Lengadòc e Rosselhon. Puèi arribèt l’afar del rescontre amb Clemenceau que li balhèt un bilhet de 100 francs per que se paguèsse lo tren de retorn. Atal, al país, se faguèt tractar de vendut e lo mond se desvirèron d’el.
 
Lo temps a passat e, uèi, la cava cooperativa d’Argelièrs vend de cantinas de vin etiquetadas «1907», «Marcelin Albert», «Lou Cigal», «les 87»; la calandreta de Bisan se ditz Calandreta Lo Cigal e lo collègi de Sant Marcèl pòrta lo nom del cap de la revòlta (çò qu’agradèt pas a una principala que veniá d’endacòm mai!).
 
Mas, aqueste dissabte 16 de julhet, l’associacion qu’òbra a la conservacion d’aquesta memòria de la revòlta vinhairona e al sovenir e al manten d’aquel luòc nautament simbolic vos convida a Argelièrs per de moments de tria dins un ambient de fèsta populara.
 
 
En sovenir del 16 de julh de 1907…
 
Lo 16 de julh de 1907, se votèt a l’Assemblada Nacionala las leis en favor del vin natural. Las manifestacions de la prima avián desblocada la situacion.
 
Alara, per festejar aquel moment e lo vin natural, rendètz-vos a 6 oras del vèspre, sus la plaça del cafè, per l’estrena d’una mòstra sus las cançons del temps de Marcelin Albèrt. Puèi, Cristian Salès e Alan Roch menaràn la passejada e vos faràn vistalhar un Argelièrs dins los passes de l’istòria. A 7h e mièja, serà l’ora de l’aperitiu, acompanhat dels cants de la Corala del Cafè. Se prepausarà un jòc de questions: “Qu’es aquò? Qu’es aquò?” e la lectura de passatges del libre 1907, la grande révolte du Midi de Gui Bechtel que serà present (reedicion de l’obratge anonciada per lèu).
 
A 8h e mièja, serà lo moment de passar a taula: lo porquet cuèit a l’ast sus plaça amb de patanas a las èrbas del país serà acompanhat d’una lesca de melon e d’un tròç de fogassa (per 15 €).
 
A 10h, los lums faràn lusir lo cafè per seguir l’espectacle del tenor Cristian Moulié que reprendrà d’aires de la fin del sègle XIX e de la debuta del sègle XX.
 
Precision: es pas interdit (al contrari) de venir costumats coma al temps de la revòlta del pòble de las vinhas e, de segur, de parlar la lenga coma los aujòls de 1907.
 
Anem: “Visca lo chuc de la semal! Lo Cigal aurà jamai son egal per defendre lo vinhal e lo vin natural!”

 
 
 
 
Alan Roch