Los elevaires e los agricultors dels Païses Basses se mobilizan dempuèi diluns passat per protestar contra la nòva legislacion environamentala, que metriá en perilh fòrça bòrias a causa de la limitacion de las emissions de nitrogèn. De tractors blòcan las principalas estradas e autoestradas, e fòrça centres de distribucion dels supermercats, mai que mai de las grandas cadenas del país. A mai, las vias d’accès a l’aeropòrt d’Amsterdam son tanplan estadas un ponch important de las protèstas, los manifestants las an blocadas e an ensajat d’accedir a las installacions e d’interrompre los vòls. Las autoritats an mobilizat la polícia militara neerlandesa, quitament amb de veïculs blindats per o evitar, mas s’es creat d’importants taps.
 
La nòva lei prevei de reduire fins al 70% de las emissions de nitrogèn per l’an 2030, una obligacion que los collectius de païsans veson impossible de complir se vòlon contunhar de foncionar corrèctament. De fach, lo govèrn calcula qu’aperaquí lo 30% de las bòrias d’elevatge poirián barrar.
 
La situacion es extrèmament tibada e se rapòrta d’afrontaments entre policièrs e manifestants, de detencions e de multas infligidas als proprietaris del tractors.
 
Lo grop d’activistas agricòlas Agractie a assegurat que las accions contunharián. Son pòrtavotz, Bart Kemp, planh que los Païses Basses ajan declarat la guèrra a “la republica dels agricultors” e a demandat lo retirament d’aquela nòva legislacion.
 
Los Païses Basses son un dels pus grands exportaires de produches agricòlas. En 2021 exportèron de produches d’una valor de près de 105 milions d’èuros. Totun, an pas respectat las nòrmas europèas d’emissions pendent de decennis.