Un còp èra… La setmana que ven serà… Es amb plaser que Cucunhan, en Corbièras, va tornar trapar una edicion de la Fèsta del Conte amb un cambiament de primièra: los tres jorns al pè del castèl de Querbús (de dimars 19 al dijòus 21 de julh) se perseguiràn amb de rendètz-vos en tèrras catalanas: lo 22 de julh a Elna e lo divendres 23 a Taltaüll. E atal lo festenal s’inscriurà al caireforc de las lengas occitana, catalana e francesa per celebrar a tres voses l’oralitat. Aquela trilogia es marcada per l’aficha que recampa un pòrc gavach, un catalan burro e un pol francés! Aquelas cinc jornadas seràn una granda fèsta que refofaràn de suspresas, d’esmogudas e de rires…
 
 
Lo sermon coma lo curat…
 
De segur, coma de costuma, la manifestacion se dobrirà dimars 19 a Cucunhan, a 3 oras del vèspre, per un concors de sermon per veire se se trapa d’amators o de professionals de la paraula del nivèl del bon abat Martin… En seguida, lo rescontre amb los vinhairons del país (18h30) prendrà la forma d’un aperitiu contat. Aquesta activitat serà un moment renovelat cada jorn. En serada, montaràn sus l’empont Anne-Gaëlle Duvochel (en francés) e lo peiregòrd Danièl Chavaroche (en occitan) amb sas istòrias inspiradas del país per mostrar la non-existéncia de frontièras entre l’universal e lo local.
 
 
Un dimècres plan fornit
 
Lo dimècres, del matin a la nuèit, contaires e contairinas prendràn de longa la paraula. Daniel Chavaroche tornarà intervenir tre 10h del matin; Patric Erard seguirà (11h15) amb de paraulas d’un còp èra pels tempses presents. Alan Roch presentarà Joan de l’Ors e sos collègas dels contes d’òc (15h30), en s’apiejant sus la mòstra “Los amics de Joan de l’Ors”. Claudi Alranq, comedian e contaire, aurà carta blanca per animar la serada (21h).
 
En francés, aniràn al rescontre dels auditòris: Bernard Barbier (10h45), Laurent Battist (14h30) , Myriam Rubis (16h30) e Michel Galaret (17h15).
 
 
Lo sieston, lovin, la paraula,…
 
Dins los moments originals del dijòus, una dormida coquina prepausada per Marie Dimas (14h30) que s’inspira dels contes d’Enric Gogaud. Kamel Guennoun e Bernard Barbier (16h) interpretaràn un espectacle dedicat al vin. Lo Teatre de las Originas presentarà sa conferéncia borlesca d’interès occitan consagrada al Patrimòni Cultural Immaterial (17h15). Se tornarà trapar Myriam Rubis (11h) e Alan Roch (11h45). Malika Verlaguet contarà dins la vesprada, a l’ora de l’espertinar (15h15), abans de dobrir la serada (21h). Olivier de Robert (22h15) clavarà aquestas 3 jornadas cucunhanencas.
 
 
Doas seradas catalanas
 
Lo divendres 22, a Elna, lo vèspre serà dedicat als dròlles e a la lenga catalana. Aperitiu contat amb los vinhairons locals (18h30) abans las prestacions d’Olivier de Robert e Jordi Mach en serada. L’endeman, a Tautaüll, se aperitiu contat e Jordi Mach son tornar al programa, es Olivier Ponsot que serà lo contaire en francés.
 
E cric e crac… Beguèri un veire de muscat e l’article es acabat!
 
 
 
 
Alan Roch
 
 
 

 
 

---

Per ne saber mai: www.contoirduconte.fr/