Divendres passat, fusilhèron l’èx-primièr ministre japonés Shinzo Abe pendent un parladís electoral dins la vila de Nara. Recebèt doas balas dins l’esquina, foguèt espitalizat en estat fòrça grèu abans de defuntar. La polícia arrestèt l'assassin sul pic, un èx-membre de l’armada.
 
Ancian cap del Partit Liberal Democrata (PLD), Shinzo Abe dirigiguèt lo govèrn japonés entre 2006 e 2007 e entre 2012 e 2020, quand quitèt lo poder per de problèmas de santat. Los imatges de l’atemptat, publicats suls rets socials, mòstran cossí lo politician tomba al sòl dins un fòrt bruch. Segon la polícia, l’arma de l’agression es una escopeta de fabricacion artisanala.
 
Japon se tròba en plena campanha per las eleccions parcialas a la cambra nauta, que se tendràn deman dimenge. L’actual primièr ministre, Fumio Kishida, dalfin de Shinzo Abe, vòl demostrar sa fòrça dins la politica japonesa. Per ara, e mai aja cancelat sos darrièrs mitings, Kishida a pas volgut suspendre la jornada electorala de deman.
 
Shinzo Abe proveniá d’una familha de linhatge politic conservator, son grandpaire e son paire èran de politicians e sa maire èra filha de l’èx-primièr ministre Nobusuke Kishi. Abe contunhava de servar una granda influéncia sus la scèna politica japonesa. Sa segonda estapa coma primièr ministre foguèt marcada per son estrategia economica, dicha Abenomics, que cercava de traire Japon de l’estancament que lo patís l’Empèri del Solelh Treslús dempuèi los ans 1990.