Las autoritats italianas an conclús al deslotjament del camp de refugiats de la Lampedosa davant las escandalosas condicions d’insalubritat que los an viscudas los qu’èran arribats sus sas còstas pendent los ans de crisi migratòria. Las darrièras 1200 personas que demoravan aquí son estadas menadas a la vila siciliana de Porto Empedocle. Lo sit de la Lampedosa èra pensat per aculhir un maxim de 350 personas e ne demoravan mai de 1800.
 
L’operacion s’accelerèt après que l’èx-consolessa màger de la vila, Giusi Nicolini,  aguèt publicat sus Facebook d’imatges que mostravan las òrras condicions de vida dels refugiats.
 
Pel responsable de l’Organizacion de las Nacions Unidas per las Migracions (OIM), Flavio di Giacomo, la situacion es fruch de la manca de volontat de las autoritats per gerir un protocòl organizat. “Se i aguèsse un sistèma de patrolhatge en Mediterranèa, o se se permetèsse que las ONG foncionèsson ben, se poiriá salvar los vaissèls en nauta mar e triar las personas per las menar als diferents pòrt sicilians, en luòc de tresmudar la Lampedosa en enfonilh”, çò a declarat a La Repubblica.
 
Segon lo Ministèri de l’Interior italian, ongan son arribats mai de 30 000 refugiats en vaissèl ongan, compreses los que pervenguèron a la Lampedosa.