Après lo rambalh causat pel Conselh General d’Aran, ara es lo Comitat d’Afrairament Occitanocatalan (CAÒC) qu’a mandat una letra al president de la Generalitat de Catalonha, Pere Aragonès, per se plànher de la nòva lei de l’educacion en Catalonha e Aran. La letra demanda que s’arrèste e revire çò que considèran qu’es “una reculada sens precedent” en çò que tanh a la proteccion de l’occitan.
 
Lo CAÒC expausa qualques questions que considèra “inacceptablas” e que quitament contravenon a la Lei de l’occitan, aranés en Aran, de 2010: asseguran que la nòva lei de l’educacion “daissa sens proteccion la lenga occitana” dins las escòlas aranesas. Segon lo president del CAÒC, Francesc Sánchez i Garcia, “la nòva lei fa amb l’occitan la meteissa causa que l’estat espanhòl amb lo catalan: lo tractar de lenga de segond nivèl”, e lo president de l’organisme denóncia “una manca de sensibilitat intolerabla envèrs l’autra lenga pròpria de Catalonha”.
 
Delà la lei de l’educacion, lo CAÒC acusa dirèctament lo Departament de Cultura de la Generalitat de reduire las subvencions per l’occitan. De remarcar que la subvencion autrejada al CAÒC per sos corses d’occitan es inferiora als ans precedents. A mai, planhon que d’autres projèctes coma la revista Sapiéncia, l’album d’ÒC Brigada Internacionala e la programacion occitana del festenal Barnasants ajan pas obtenguda cap de subvencion.
 
D’autre caire, la Sindica d’Aran deplora, dins una entrevista publicada per Vilaweb, que las subvencions de la Generalitat per promòure l’occitan anen a de projèctes que “non an pas cap d’impacte ena Val d’Aran”.