Lo primièr apèl a microprojèctes de cooperacion transfrontalièra pels Pirenèus, amb de fonzes publics sortits del programa europèu POCTÈFA, a triat doas proposicions occitanas demest las 25 seleccionadas en tot. Aqueles dos projèctes beneficiaràn d’una part dels 575 000 èuros destinats als projèctes culturals, educatius o environamentals elegits, que trabalharàn d'accions de proximitat al territòri.
 
Un es Neouismont, una maleta pedagogica pels nòus usatgièrs de la montanha, que serà desvolopat per Règi Observatòri de Montanha (Orlun, Savartés) en collaboracion amb la Societat Catalana d’Educacion Environamentala e la Fondacion Vida Silvèstra Mediterranèa de las Illas Balears. L'autre es JACTRA, acrònim de Joventut Activa Transfrontalièra; l’associacion ATICA es a la direccion aquel projècte, acompanhada de la comuna e del Comitat de Fèstas de Marinhac (Frontinhas e Bavartés) e de la Comuna de Bossòst (Quate Lòcs, Val d’Aran).
 
Aqueles projèctes de cooperacion transfrontalièra fan partida dels 9 triats jos la coordenacion de l’Euroregion Pirenèus Mediterranèa, als quals participaràn d'autras entitats de la region Occitània, de las illas Balearas, d’Andòrra e de Catalonha. Cal remembrar qu'aquel organisme transfrontalièr, integrat per la region nomenada Occitània, la Generalitat de Catalonha e lo Govèrn Balear, a per tòca de crear en aquel territòri un pòl de desvolopament duradís, basat sus l'innovacion e l'integracion sociala e economica.